उन्हाळा लागताच अनेक घरांमध्ये गृहिणी पापडांबरोबरच वर्षभरासाठी पुरेल एवढा मसाला तयार करून ठेवत असतात. तिखट तयार करण्यासाठी लाल मिरची घेऊन ती वाळवून तिखट तयार करीत असतात. तसेच जून-जुलैमध्ये कैरीचे लोणचे घरोघरी टाकले जाते. त्यासाठी व वर्षभरासाठी पुरेल असे घरगुती मसालेही तयार करण्यात येत असतात. मात्र यावर्षी महागाईचा ठसका सर्व वस्तूंना बसू लागला आहे. पेट्रोल महागले आहे. त्याबरोबरच गॅसही महागला आहे. त्यापाठोपाठ आता मिरची-मसाल्याचे दर गगनाला भिडल्याने, लोणचे तसेच वर्षभराचा मसाला कसा तयार करावा, असा प्रश्न सर्वसामान्य कुटुंबातील गृहिणीस उपस्थित झालेला दिसून येतो. उन्हाळ्याच्या दिवसात होणाऱ्या मसाला, तिखटामुळे बाजारपेठेत लाखो रुपयांची उलाढाल होत असते. मात्र आता ही उलाढाल ढप्प होण्याची शक्यताही नाकारता येत नाही
दरम्यान, मिरची व मसाल्याचे दर यावर्षी वाढल्याने, अनेक गृहिणींनी यावर्षी वर्षाचे तिखट-मसाले तयार करण्याचे नियोजन रद्द केल्याचे सांगितले.
मोठ्या कुटुंबाना फटका बसणार
ग्रामीण भागात अनेक ठिकाणी एकत्रित कुटुंबे आहेत. अशा कुटुंबामध्ये उन्हाळ्यात तिखट-मसाले तयार कऱण्याचे उद्योग केले जातात. तसेच जून-जुलैमध्ये कैरीचे लोणचे तयार करताना याच तिखट-मसाल्याचा वापर केला जात असतो. मात्र मिरची तसेच मसाला साहित्याचे दर आवाक्याबाहेर जात असल्याने, अनेक कुटुंबाचे आर्थिक गणित कोलमडलेले आहे. त्यामुळे मोठ्या कुटुंबांमध्ये फक्त तिखट-मसाले तयार करायचे म्हणून केले जात आहेत. त्यात वर्षभराचा विचार नाही.
दरम्यान, घरगुती तिखट-मसाले तयार होणार नसल्याने, व्यापाऱ्यांचे चांगलेच फावणार आहे.
गुंटूरहून मिरचीची आवक होते
n धुळे त्याचबरोबर नंदुरबार जिल्ह्यातही मिरचीचे मोठ्या प्रमाणात उत्पादन होत असते. त्याचबरोबर मालपूर, सुराय, बाह्मणे येथूनही मिरची बाजारात येते.
n मात्र काही व्यापारी आंध्रप्रदेशातील गुंटूर येथून मिरची आणतात.
आमच्याकडे दरवर्षी उन्हाळ्यातच मिरची खरेदी करून घरगुती तिखट तयार केले जाते. तसेच मसालेही काही प्रमाणात तयार केले जातात. परंतु मिरचीचे दर वाढल्याने, तिखट तयार करण्याचा विचार नाही.
- अंजली वैद्य
आमचे मोठे कुटुंब आहे. त्यामुळे आम्ही तिखट, मसाले घरीच तयार करीत असतात. घरी तयार केलेले पदार्थ जास्त स्वादिष्ट असतात. मात्र मसाल्याचे दर आवाक्याच्या बाहेर आहेत. त्यामुळे यावर्षी तयार मसाला घेऊ.
- साधना पाटील,
गृहिणी