धुळे : कोरोना प्रतिबंधक लस घेतल्यानंतर मद्यपान करावे की करू नये असे प्रश्न मद्य शाैकिनांकडून उपस्थित केले जात आहेत. गप्पांमध्ये हा विषय रंगतोय. पण सामाजिक धाकाने कुणीही जाहीरपणे विचारायला धजावत नसल्याचे चित्र आहे. परंतु, लसीकरण आणि मद्यपानाचा काही संबंध नाही. ज्यांना मद्यपान करायचे ते करू शकतात. परंतु लसीकरणानंतर मद्यपान किंवा त्याचे अतिसेवन टाळणे योग्यच होईल, असे मत तज्ज्ञांकडून व्यक्त होत आहे.
जिल्ह्यात ४५ वर्षांवरील नागरिकांचे लसीकरण सुरू आहे. लसीकरणासाठी नागरिक गर्दी करीत आहेत. मात्र, काही मद्य शाैकीन शंका उपस्थित करीत आहेत. याबाबत थेट विचारणाही होत आहे. लस घेतल्यानंतर किती दिवसांनंतर मद्यपान करावे, आहारात काय घ्यावे व काय घेऊ नये? यासारखे प्रश्न विचारले जात आहेत. लसीकरण व मद्यपान याचा फारसा संबंध नाही, तसेच यासंदर्भात संशोधनही झाले नसल्याचे दिसून येत आहे. मद्यपान करायचेच झाले तर लसीकरणापूर्वी व लसीकरणानंतर दाेन आठवडे मद्याचे अतिसेवन टाळावे. कोरोना लसीकरणामुळे रोगप्रतिकार शक्ती निर्माण होणे अपेक्षित असते. तिला अतिमद्य सेवनाने बाधा येण्याची शक्यता नाकारता येत नाही. त्यामुळे मद्यसेवन टाळलेलेच बरे असा सल्लाही वैद्यकीय क्षेत्रातील तज्ज्ञ देत आहेत. दरम्यान, जिल्ह्यातील दारू दुकाने मंगळवारी दुपारपासून बंद झाले आहेत.
आरोग्याच्या दृष्टीने हानीकार
मद्यसेवन अथवा कोणतेही व्यसन हे आरोग्याच्या दृष्टीने हानीकारकच असते. तरुण वयात शाैक किंवा आकर्षण म्हणून सुरू केलेले मद्यसेवन नंतर कधी व्यसनाचे रूप घेत हे कळतच नाही. मद्यसेवनाच्या आहारी गेलेल्या अनेकांचे संसार उदध्वस्त झाल्याची उदाहरणे आहेत. कोरोनाच्या काळात तर मद्याचे अतिसेवन टाळणे गरजेचे आहे. कारण मद्यसेवनामुळे रोगप्रतिकारक शक्ती कमी होते, असे वैद्यकीय क्षेत्रातील जाणकारांचे मत आहे. कोरोना लसीकरणाच्या मोहिमेदरम्यान मद्यसेवनाचा मुद्दा पुढे आला आहे. धक्कादायक म्हणजे कोरोनाचा संसर्ग काळात लसीकरण केलेल्या काही शाैकिनांनी तर एक दिवासाचाही गॅप न देता मद्यसेवनाचा शाैक पूर्ण करताना दिसत आहेत. विशेष म्हणजे या काळात मद्यसेवनामुळे कुणाला उपचारासाठी रुग्णालयात जावे लागल्याचे उदाहरण समोर आलेले नाही.
डाॅक्टरांनी वर्ज्य केले असेल तर मद्यपान टाळावे
केवळ मद्यपान आणि लसीकरण हाच मुद्दा नाही तर काही मद्यशाैकीन अतिसेवन करीत असल्याने त्यांच्या आरोग्यावर विपरीत परिणाम झालेला असतो. प्रसंगी त्यांच्यावर उपचार करण्याची वेळ येते. काहींचे तर लीव्हर खराब झालेले असते. अशा रुग्णांना डाॅक्टर मद्यपान न करण्याचा सल्ला देतात. अशा रुग्णांनी मद्यपान करूच नये, असा सल्ला वैद्यकीय क्षेत्रातील तज्ज्ञांनी दिला आहे. दरम्यान, शासनाने कठोर निर्बंध लादल्यामुळे जिल्ह्यातील दारू दुकाने बंदचे आदेश जिल्हाधिकाऱ्यांनी दिले असले तरी याचे काटेकोर पालन होईलच याची शाश्वती नाही. काही महाभाग काळाबाजारात मद्याची विक्री करत असल्याचा अनुभव आहे.
कोरोना लसीकरणानंतर मद्यपान करावे किंवा करू नये याबाबत शासनाच्या कोणत्याही सूचना अथवा मार्गदर्शन नाही. तसे कोणतेही आदेश नाहीत. परंतु मद्यपान करणे आरोग्याच्या दृष्टीने हानीकारक असल्याने नागरिकांनी मद्यपान किंवा त्याचे अतिसेवन टाळावे.
- डाॅ. विशाल पाटील, धुळे जिल्हा कोरोना नोडल अधिकारी
कोरोना लसीकरण आणि मद्यपान यांचा काही एक संबंध नाही. कोरोना लसीकरणानंतर मद्यपान केले तरी त्याचा काही परिणाम होईल असे नाही. परंतु इतर काही कारणांमुळे एखाद्या व्यक्तीला डाॅक्टरांनी मद्यपान करण्यास मनाई केली असेल तर त्याने टाळावे.
- डाॅ. पल्लवी सापळे, अधिष्ठाता, हिरे वैद्यकीय महाविद्यालय, धुळे
धुळे जिल्ह्यात मार्च महिन्यात झालेली दारू विक्री लीटरमध्ये
देशी दारू २,०९,६६२
विदेशी दारू १,७०,०७४
बिअर १,९१,५५२