पारगाव : वाशी तालुक्यातील पारगाव येथे जुलै महिन्यात पुन्हा कोरोनाचे रुग्ण आढळून येत असून, सध्या ११ बाधित रुग्ण आहेत. असे असताना नागरिकांकडून मात्र संसर्ग रोखण्याच्या अनुषंगाने नियम पाळण्याकडे दुर्लक्ष होत असल्याचे चित्र आहे.
येथील कोरोनाच्या दुसऱ्या लाटेत आजपर्यंत आढळून आलेल्या बाधितांची संख्या १४० इतकी झाली आहे. जून महिन्याच्या शेवटी येथील ॲक्टिव्ह रुग्णसंख्या शून्यावर आली होती. यामुळे ग्रामस्थांनी सुटकेचा नि:श्वास सोडला. शिवाय, रुग्ण नसले तरी व्यापारी व नागरिकांकडून नियमांचे काटेकोर पालन केले जात होते; परंतु मागील काही दिवसांत नागरिक पुन्हा बेफिकीर झाल्याचे दिसत आहेत. परिणामी जुलैच्या दुसऱ्या आठवड्यापासून पुन्हा कोरोना रुग्ण आढळून येत आहे. जुलै महिन्यात येथे १७ रुग्ण आढळले असून, या सर्वांवर वाशी येथील कोविड विलगीकरण कक्षात उपचार करण्यात आले. सध्या ११ रुग्ण ॲक्टिव्ह आहेत. त्या तुलनेत तपासणीसाठी नागरिकांचा सहभागदेखील अत्यल्प असून, विनामास्क फिरणाऱ्यांची संख्यादेखील दिवसेंदिवस वाढत आहे. यामुळे कोरोनाचा धोका वाढण्याची शक्यता नाकारता येत नाही.