उस्मानाबाद : जिल्हा परिषदेने १३ व १४ व्या वित्त आयोगाच्या शिल्लक, व्याज रकमेतून रुग्णवाहिका खरेदी करण्याचा प्रस्ताव ग्रामविकास विभागाकडे दिला आहे. मात्र, निर्णयाविना तो प्रलंबित असल्याच्या विषयाकडे शुक्रवारी आमदार राणाजगजितसिंह पाटील यांनी लक्ष वेधले. यावर उपमुख्यमंत्री अजित पवार यांनी रुग्णवाहिका खरेदीसाठी संबंधितांना तातडीने सूचना करण्याची ग्वाही दिली.
जिल्ह्यातील ग्रामपंचायतींना मिळालेल्या १३ व्या वित्त आयोगाची शिल्लक रक्कम व १४ व्या वित्त आयोगाच्या रकमेवरील व्याजाची सुमारे ४ कोटींची रक्कम शासनाकडे जमा करण्यात आली आहे. या रकमेतून २२ रुग्णवाहिका खरेदी करण्याची मागणी जिल्हा परिषदेने ग्रामविकास खात्याकडे केली आहे. मात्र, ती प्रलंबित राहिल्याचा मुद्दा आ. पाटील यांनी शुक्रवारच्या बैठकीत उपस्थित केला. दरम्यान, यासोबतच उस्मानाबादला विशेषतज्ज्ञ देण्याबाबत वारंवार विनंती करण्यात आली आहे. या अनुषंगाने बदली आदेश काढले होते. परंतु, केवळ दोनच डॉक्टर रूजू झाले. हे अन्यायकारक असून, जिल्हयातील डॉक्टर्स व विशेषतज्ज्ञांची रिक्त पदे तातडीने भरण्याची मागणी केली. यावर आरोग्यमंत्री टोपे यांनी वैद्यकीय शिक्षण विभागाच्या संचालकांशी याबाबत चर्चा करण्याचे व रिक्त पदे भरण्याबाबत लवकरात लवकर कार्यवाही करण्याचे मान्य केले. विशेषतज्ज्ञांच्या कमतरतेमुळे अतिदक्षता विभागातील रुग्णांवर तज्ज्ञांच्या मार्गदर्शनाने उपचार करता यावेत यासाठी टेली आयसीयू सुरू करण्याचे निर्देश जिल्हा प्रशासनाला देण्याची मागणी केली, ही कार्यवाही लागलीच करण्याची सूचना टोपे यांनी दिली. तिसऱ्या लाटेची तीव्रता, लहान मुलांचा धोका लक्षात घेऊन केंद्र सरकारने दिलेल्या मार्गदर्शक सूचनांप्रमाणे ग्रामीण भागात कोविड केअर सेंटर सुरू करण्याच्या सूचना जिल्हा प्रशासनाला द्याव्यात, या मागणीवरही टोपे यांनी ते सुरू करण्याचे निर्देश दिले.
नळदुर्गच्या रुग्णालयास जुलैमध्ये निधी...
नळदुर्ग येथील ग्रामीण रुग्णालयाची नवीन इमारत अनेक दिवसांपासून अर्धवट आहे. कोरोनाच्या तिसऱ्या लाटेचा सामना करण्यासाठी सदरील रुग्णालय कार्यान्वित होणे गरजेचे आहे. रुग्णालयाच्या उर्वरित कामांसाठी आवश्यक ११ कोटी ३८ लाखांचा निधी पावसाळी अधिवेशनातील पुरवणी मागण्यांमध्ये उपलब्ध करून देण्याची मागणी आ. पाटील यांनी केली. त्यावर जुलै महिन्यात हा निधी उपलब्ध करून देण्याचे आश्वासन राजेश टोपे यांनी दिले.