Tripura Murder Case: देशभरात सध्या राजा रघवुंशी हत्या प्रकरणाची जोरदार चर्चा सुरु आहे. हनिमूनसाठी गेलेल्या राजा रघुवंशीची पत्नी सोनमने हत्या केली होती. मेघालयातील राजा रघुवंशी हत्याकांड ताजे असतानाच शेजारच्या त्रिपुरा येथे एका २८ वर्षीय तरुणाचा मृतदेह आईस्क्रीम फ्रीजरमध्ये आढळल्याने खळबळ उडाली. त्रिपुरात लव्ह ट्रँगलमुळे या तरुणाची हत्या करण्यात आली. मृत तरुणाचे एका २० वर्षीय मुलीशी प्रेमसंबंध होते. मात्र मुलीचा चुलत भाऊही तिच्यावर प्रेम करत होता. याच प्रेमप्रकरणातून २८ वर्षीय तरुणाची हत्या करण्यात आली आणि त्याचा मृतदेह आईस्क्रीम फ्रीजरमध्ये लपवण्यात आला.
त्रिपुराची राजधानी असलेल्या आगरतळापासून १२० किमी अंतरावर असलेल्या गंडाचेरा बाजारात हा सगळा प्रकार घडला. शरीफुल इस्लामची गळा दाबून हत्या करुन त्याचा मृतदेह आईस्क्रीम फ्रीजरमध्ये लपवण्यात आला होता. याप्रकरणी पोलिसांनी डॉक्टर आणि त्याच्या आई वडिलांसह सहा जणांना अटक केली आहे. शरीफुल इस्लाम हा आगरतळा स्मार्ट सिटी प्रकल्पात इलेक्ट्रिशियन म्हणून काम करत होता. त्याचे २० वर्षीय तरुणीची प्रेमसंबंध होते. दुसरीकडे, तरुणीचा चुलत भाऊ डॉ. दिबाकर साहा (२८) हा देखील तिच्यावर प्रेम करत होता. या लव्ह ट्रँगलमुळे, दिबाकरने शरीफुलला संपवण्याचा कट रचला. नुकतेच भांडण झाल्यापासून शरीफुल आणि तरुणी एकमेकांशी बोलत नव्हते आणि दिबाकरला याची माहिती मिळाली.
८ जूनच्या रात्री दिबाकरने शरीफुलला गिफ्ट देण्याच्या बहाण्याने दक्षिण इंद्रनगर येथील जॉयदीप दासच्या घरी बोलावले. तिथे पोहोचताच दिबाकरने त्याचे साथीदार जॉयदीप दास (२०), अनिमेश यादव (२१) आणि नबनिता दास (२५) यांच्यासह शरीफुलचा गळा दाबून खून केला. हत्येनंतर, मृतदेह ट्रॉली बॅगमध्ये भरला. दिबाकरने ही बॅग दोन दिवसांपूर्वीच खरेदी केली होती. ९ जून रोजी दिवाकरचे आई वडील दीपक साहा (५२) आणि देबिका साहा हे गंडाचेराहून आगरतळा येथे आले. त्यांनी बॅग गंडाचेरा येथे आणली आणि शरीफुलचा मृतदेह दुकानातील आईस्क्रीम फ्रीजरमध्ये लपवून ठेवला.
शरिफुलच्या कुटुंबाने पोलिसांकडे तो बेपत्ता असल्याची तक्रार दाखल केली होती, त्यानंतर पोलिसांनी तपास सुरू केला. तपासादरम्यान, शरीफुल आरोपी दिवाकरच्या घरी गेल्याचे समोर झाले. पोलिसांनी दिवाकरची चौकशी केली असता त्याने गुन्हा कबूल केला आणि मृतदेह फ्रिजमध्ये असल्याचे सांगितले. सखोल तपासानंतर पोलिसांनी मंगळवारी रात्री दिबाकर साहा, दीपक साहा, देबिका साहा, जॉयदीप दास, अनिमेश यादव आणि नवनीता दास या सहा आरोपींना अटक केली. पोलिसांनी बुधवारी दुपारी गंडाचेरा इथल्या फ्रीजरमधून मृतदेह बाहेर काढला.