जावांनी एकमेकींच्या पतींवर केला बलात्काराचा आरोप, एकीने गोठ्यात, तर दुसरीने लॉजमध्ये बलात्कार झाल्याची दिली तक्रार

Crime News: नात्याने एकमेकींच्या जावा लागणाऱ्या दोन महिलांनी एकमेकींच्या पतींविरोधात बलात्काराची तक्रार दिल्याची धक्कादायक घटना समोर आली आहे.

 पुणे - नात्याने एकमेकींच्या जावा लागणाऱ्या दोन महिलांनी एकमेकींच्या पतींविरोधात बलात्काराची तक्रार दिल्याची धक्कादायक घटना समोर आली आहे. ही घटना पुणे जिल्ह्यात घडली असून, या प्रकऱणी राजगड पोलीस ठाण्यात तक्रार नोंदवण्यात आली आहे. या तक्रारीवरून पोलिसांनी दोन वेगवेगळ्या गटांमधील चार व्यक्तींवर बलात्काराचा गुन्हा दाखल करून त्यांना बेड्या ठोकल्या आहेत.

या प्रकरणातील तक्रारदार महिला ह्या नात्याने एकमेकींच्या चुलत जावा आहेत. तसेच त्यांनी एकमेकींच्या पतींविरोधात बलात्काराची तक्रार दिली आहे. यामधील एकीने तिच्यावर शेतातील गोठ्यात बलात्कार झाल्याचा आरोप केला आहे. तर दुसरीने तिच्यावर लॉजवर नेऊन बलात्कार करण्यात आल्याचा आरोप केला आहे. तशी तक्रार त्यांनी पोलिसांमध्ये दिली आहे. भोर तालुक्यामध्ये बलात्काराचे हे परस्परविरोधी गुन्हे दाखल झाले आहेत.

या प्रकरणातील एका महिलेने तिच्यावर १० ऑक्टोबर ते ५ नोव्हेंबरदरम्यान शेतातील गोठ्यात बलात्कार केल्याचा आरोप तिघा जणांविरोधात करत तक्रार दिली होती. उसाला पाणी देण्यासाठी गेले असता चुलत दिराने विनयभंग केला. त्यानंतर अन्य दोघांसोबत गोठ्यामध्ये येऊन आळीपाळीने बलात्कार केला असे या महिलेने तक्रारीत म्हटले आहे.

तर या प्रकरणातील मुख्य आरोपी ठरवण्यात आलेल्याच्या पत्नीने पीडित महिलेच्या पतीवर बलात्काराचा आरोप केला आहे. ऑक्टोबर २०२० ते नोव्हेंबर २०२१ या काळात तिच्यावर राहत्या घरी आणि लॉजवर नेऊन बलात्कार करण्यात आल्याची तक्रार तिने दिली. त्यावरून पोलिसांनी गुन्हा दाखल करून घेतला आहे. तसेच आरोपीस अटक करण्यात आली आहे.