पतीने कर्ज फेडले नाही म्हणून पत्नीला झाडाला बांधून मारहाण; मुख्यमंत्र्यांच्या मतदारसंघातील प्रकार

आंध्र प्रदेशात एका महिलेला झाडाला बांधून मारहाण करण्यात आली आहे.

Andhra Pradesh Crime: आंध्र प्रदेशातील चित्तूर जिल्ह्यातून एक धक्कादायक घटना समोर आली आहे. आंध्र प्रदेशचे मुख्यमंत्री चंद्राबाबू नायडू यांच्या मतदारसंघात एका व्यक्तीने एका महिलेला खेचत आणत झाडाला बांधून मारहाण केली. या घटनेचा व्हिडीओ व्हायरल झाल्यानंतर मुख्यमंत्री चंद्राबाबू नायडू यांनी कारवाईचे आदेश दिले आहेत. महिलेवर हल्ला करणारा आरोपी हा तेलुगू देसम पार्टीचा सदस्य असल्याचे समोर आलं आहे. या प्रकरणात आंध्र पोलिसांनी आरोपी आणि त्याच्या नातेवाईकांना अटक केली आहे.

तेलुगू देसम पक्षाचा सदस्य एस माणिकप्पा याने महिलेला मुलांसमोरच झाडाला बांधून मारहाण केल्याचा आरोप आहे. शांतीपुरमच्या केंचनबल्ला येथील रहिवासी असलेल्या या महिलेवर चित्तूर जिल्ह्यातील कुप्पम नगरपालिकेतील नारायणपुरम येथे हल्ला झाला. पीडित महिला शाळेतून तिच्या मुलाचे ट्रान्सफर सर्टिफिकेट घेण्यासाठी गावात गेली होती. या घटनेचा व्हिडीओ व्हायरल झाल्यानंतर मुख्यमंत्र्यांनी या प्रकरणी करवाई करण्याचे आदेश दिले.

पोलिसांनी दिलेल्या माहितीनुसार, महिलेच्या पतीने दोन वर्षांपूर्वी माणिकप्पा याच्याकडून ८० हजार रुपयांचे कर्ज घेतले होते. थोड्या थोड्या वेळाने तो पैसे देऊन माणिकप्पाचे कर्ज फेडत होता. पण काही दिवसांपूर्वी तो गाव सोडून बंगळुरूला निघून आला. तिथे तो बांधकाम मजूर म्हणून काम करू लागला. बंगळुरूला आल्यानंतर त्याने माणिकप्पाला पैसे देणे बंद केले. त्यानंतर १६ जून रोजी ती तिच्या मुलाच्या प्रवेशासाठी ट्रान्सफर सर्टिफिकेट घेण्यासाठी तिच्या गावात आली होती. त्यावेळी माणिकप्पाने तिला झाडाला बांधले आणि पैसे मागितले. यावेळी माणिकप्पाच्या मेव्हण्याने आणि पत्नीने महिलेला मारहाण केली. 

या प्रकरणात पोलिसांनी माणिकप्पा आणि त्याच्या कुटुंबातील पाच सदस्यांना अटक केली आहे. या घटनेचा व्हायरल झाला होता. या व्हिडिओमध्ये माणिकप्पाची पत्नी गावकऱ्यांनी रोखल्यानंतरही महिलेला मारताना दिसत आहे. त्यानंतर मुख्यमंत्र्यांनी पोलीस अधिकाऱ्यांशी बोलून या गुन्ह्यात सहभागी असलेल्या सर्वांवर कठोर कारवाई करण्याचे आदेश दिले.