गळ्याला हात-पाय बांधले, कचऱ्याच्या गाडीत फेकलं; लिव्ह इनमध्ये राहणाऱ्या महिलेचा सापडला मृतदेह

बंगळुरुमध्ये लिव्ह इनमध्ये राहणाऱ्या एका महिलेची हत्या करुन मृतदेह कचऱ्याच्या गाडीत टाकण्यात आला होता

Bengaluru Crime: बंगळुरूमध्ये कचऱ्याच्या ट्रकमध्ये महिलेचा मृतदेह आढळल्याने खळबळ उडाली आहे. या प्रकरणी पोलिसांनी मोठा खुलासा करत हत्येच्या आरोपाखाली लिव्ह-इन पार्टनरला अटक केली. आशा असे या महिलेचे नाव आहे, जी मोहम्मद शमसुद्दीनसोबत लिव्ह-इन रिलेशनशिपमध्ये होती. पोलिसांनी शमसुद्दीनला हत्येच्या आरोपाखाली अटक केली आहे. रविवारी स्थानिकांनी कचऱ्याच्या ट्रकमध्ये मृतदेह पाहिल्यानंतर पोलिसांना याची माहिती दिली होती.

रविवारी बंगळुरु महानगरपालिकेच्या कचरा गोळा करण्यासाठी वापरल्या जाणाऱ्या ट्रकमध्ये एक मोठी पॉलिथिन पिशवी आढळली, ज्यातून दुर्गंधी येत होती. दुर्गंधी वाढत गेल्याने लोकांनी पिशवीची तपासणी केली. पिशवीमध्ये एका महिलेचा मृतदेह होता. पिशवीत बांधलेल्या मृतदेहाचे हात पाय गळ्याला बांधलेले होते. घटनेची माहिती मिळताच पोलीस घटनास्थळी दाखल झाले आणि हत्येचा गुन्हा दाखल करण्यात आला. त्यानंतर मृतदेह शवविच्छेदनासाठी पाठवण्यात आला.

सीसीटीव्ही फुटेज आणि इतर पुराव्यांच्या मदतीने पोलीस आशाचा प्रियकर मोहम्मद शमसुद्दीनपर्यंत पोहोचले. तो मूळचा आसामचा असल्याची माहिती समोर आली. पोलिसांनी दिलेल्या माहितीनुसार, शमसुद्दीन गेल्या दीड वर्षांपासून ४० वर्षीय आशासोबत प्रेमसंबंधात होता. दोघेही बंगळुरूच्या हुलीमावू भागातील एका सोसायटीत भाड्याने राहत होते. दोघेही विवाहित असून विवाहित जोडप्यासारखे राहत होते.

दारू पिण्यावरून दोघांमध्ये भांडण झाले आणि भांडण इतके वाढले की शमसुद्दीनने आशाची हत्या केली. त्यानंतर शमसुद्दीनने आशाचा मृतदेह स्वतःच्या बाईकवरुन नेला आणि महापालिकेच्या कचरा ट्रकमध्ये टाकला. प्राथमिक तपासात आशाचा गळा दाबून हत्या करण्यात आली आणि त्यानंतर मृतदेह एका पिशवीमध्ये भरून रात्री उशिरा कचरा गाडीत टाकण्यात आला. पोलिसांनी घटनास्थळाजवळ बसवण्यात आलेले सीसीटीव्ही फुटेज तपासले असता एक संशयास्पद बाईक घटनास्थळाकडे जाताना दिसत होती. त्याच आधारे पोलिसांनी शमसुद्दीनला अटक केली.