पत्नीच्या अनैतिक संबंधाचा संशय आला; पती थेट पोलीस ठाण्यात पोहोचला, म्हणाला: 'मी बायकोला मारलं!'

पत्नीच्या चारित्र्यावर संशय घेऊन पतीने लोखंडी रॉडने हल्ला करत तिला मारहाण केली, अन् त्यातच..

उत्तर प्रदेशातील फतेहपूर जिल्ह्यातून एक हादरवून सोडणारी घटना समोर आली आहे. पत्नीच्या चारित्र्यावर संशय घेऊन पतीने लोखंडी रॉडने हल्ला करत तिची निर्घृण हत्या केली. धक्कादायक बाब म्हणजे, खून केल्यानंतर आरोपी पतीने स्वतःहून पोलीस ठाणे गाठले आणि आपण आपल्या पत्नीची हत्या केल्याचे पोलिसांना सांगितले. या घटनेनंतर परिसरात मोठी खळबळ उडाली आहे.

स्वतःच पोहोचला राधा नगर पोलीस ठाण्यात अन्.. 

फतेहपूर जिल्ह्यातील राधा नगर पोलीस ठाण्याच्या हद्दीतील झाऊपूर पुलाजवळ राहणारा अजय सिंह याने रविवारी सकाळी पोलीस ठाण्यात हजर होऊन एक धक्कादायक कबुली दिली. "मी माझ्या पत्नीची लोखंडी रॉडने मारहाण करून हत्या केली आहे," असे त्याने पोलिसांना सांगितले. अजयचे बोलणे ऐकून पोलिसांना विश्वास बसेना, पण घटनेचे गांभीर्य लक्षात घेऊन पोलिसांनी त्याला तात्काळ ताब्यात घेतले आणि तातडीने घटनास्थळी धाव घेतली.

पत्नीचा मृतदेह रक्ताच्या थारोळ्यात

पोलिसांना झाऊपूर पुलाजवळील अजय सिंह आणि त्याची ३० वर्षीय पत्नी शिखा सिंह यांच्या घरात शिखा यांचा रक्ताच्या थारोळ्यात पडलेला मृतदेह आढळला. पोलिसांनी केलेल्या प्राथमिक चौकशीत आरोपी अजय सिंहने म्हटले की, त्याची पत्नी शिखाचे अनैतिक संबंध होते. वारंवार समजावूनही ती ऐकत नव्हती. याच कारणामुळे शनिवारी रात्री दोघांमध्ये जोरदार वाद झाला आणि रागाच्या भरात त्याने लोखंडी रॉडने तिच्यावर हल्ला करून तिची हत्या केली.

सीओ जाफरगंज दुर्गेशदीप यांनी दिलेल्या माहितीनुसार, पोलीस पथक घटनास्थळी हजर आहे. पोलिसांनी शिखा यांचा मृतदेह ताब्यात घेऊन शवविच्छेदनासाठी पाठवला आहे. आरोपी पती अजय सिंह याला पोलिसांनी ताब्यात घेतले असून त्याची कसून चौकशी सुरू आहे. त्याच्याविरोधात योग्य ती कारवाई करण्यात येणार आहे.