MP Crime News, Boyfriend killed Girlfriend: दिल्लीत आफताब नावाच्या तरूणाने श्रद्धा नावाच्या २६ वर्षीय तरूणीची हत्या केल्याच्या घटनेने संपूर्ण देश हादरला आहे. हे प्रकरण ताजं असतानाच एका प्रियकराने आपल्या गर्लफ्रेंडचा खून केल्याची आणखी एक घटना समोर आली आहे. गर्लफ्रेंडची हत्या केल्यानंतर गेल्या ५ दिवसांपासून हा आरोपी फरार आहे. इतकेच नव्हे तर तो दररोज सोशल मीडिया इन्स्टाग्रामवरून व्हिडीओ पोस्ट करत पोलिसांना चॅलेंज करताना दिसत आहे. त्यामुळे मध्य प्रदेश पोलिसांसाठी हे आता एक वेगळेच आव्हान समोर उभे ठाकले आहे.
नक्की काय घडलं?
मध्य प्रदेशच्याजबलपुरमधील एका रिसॉर्टमध्ये २५ वर्षीय तरूणीचा तिच्याच प्रियकराने गळा कापून खून केला. त्यानंतर प्रियकर तेथून फरार झाला. या प्रियकराला शोधून देईल, त्याला एक लाखाचे इनामही पोलिसांनी जाहीर केले आहे. पण असे असूनही पोलिस त्याला शोधण्यात अद्याप अपयशी ठरले आहेत.
कसा घडला प्रकार?
हे प्रकरण आहे मध्य प्रदेशच्या जबलपूर रिसॉर्टचे आहे. तिथे तरुणीची हत्या करण्यात आली. पण हत्येला ५ दिवस उलटूनही आरोपी पोलिसांच्या आवाक्याबाहेर आहे. या दरम्यान आरोपी सोशल मीडियावर काही ना काही अपडेट करत आहे. पोलिसांनी लाखोंचे बक्षीस जाहीर करूनही तो कायद्याच्या कचाट्यातून बाहेर आहे. आरोपीने जबलपूर येथील मेखला रिसॉर्टमध्ये हे दुष्कृत्य केले. तेव्हापासून तो फरार आहे.
सॉरी बाबू... स्वर्गात भेटू!
प्रेयसीच्या हत्येनंतर फरार झालेला आरोपी अभिजीत पाटीदार त्याच्या इन्स्टाग्राम आयडीवरून मध्य प्रदेश पोलिसांना सतत आव्हान देताना दिसत आहे. याशिवाय आरोपीने त्याच्या मृत गर्लफ्रेंडसह आयडीसह अनेक पोस्टही शेअर केल्या आहेत. गुन्हा केल्याच्या दुसर्याच दिवशी त्याने सोशल मीडियावर लिहिले की, “माझं तुझ्यावर प्रेम आहे बाबू, मला माफ कर... आपण आता स्वर्गात भेटू…”
दरम्यान, जबलपूरचे अतिरिक्त एसपी शिवेश सिंह बघेल म्हणाले, “आम्ही सायबर क्राईम टीमला यासंबंधी सर्व तपशील विचारले आहेत. मृत व्यक्तीच्या सोशल मीडिया अकाऊंटवरून पोस्ट करणारी व्यक्ती ओळखीची व्यक्ती असू शकते किंवा ती आरोपी देखील असू शकते. पोलिसांनी दिलेल्या माहितीनुसार, पाटीदारने केवळ खूनच केला नाही, तर जबलपूरमधील व्यावसायिकांची लाखोंची फसवणूकही केली आहे."