पाटणा - बिहारमध्ये एका अल्पवयीन मुलीवर सामूहिक बलात्कार करण्यात आल्यानंतर गया जिल्हा पंचायतने तिचं मुंडन करत गावात धिंड काढण्यात आल्याची धक्कादायक घटना घडली आहे. आरोपींच्या नातेवाईकांच्या प्रभावाखाली पंचायतने मुलीला ही शिक्षा सुनावली होती अशी माहिती पोलिसांनी दिली आहे. ही धक्कादायक घटना घडण्याआधी १४ ऑगस्ट रोजी काहीजणांनी मिळून पीडित मुलीचं अपहरण केलं होतं अशी माहिती पोलिसांनी दिली. त्यांनतर पीडित अल्पवयीन मुलीला जबरदस्तीने स्थानिक पंचायतीच्या इमारतीवर घेऊन गेले आणि ती बेशुद्ध पडेपर्यंत तिच्यावर आळीपाळीने सामूहिक बलात्कार केला. याप्रकरणी पोलिसांनी सहाजणांना ताब्यात घेतले आहे. पोलीस त्यांची चौकशी करत आहेत.
घटनेच्या दुसऱ्या दिवशी एका गावकऱ्याने तरुणीला पाहिल्यानंतर तिच्या कुटंबियांना कळवलं. यानंतर तिला घरी नेण्यात आलं. गावात आरोपींच्या नातेवाईकांचा वचक असल्याने पंचायतीने आरोपींना शिक्षा सुनावण्याऐवजी पीडित मुलीलाच दोष देत तिचे मुंडन करून धिंड काढली. घटनेच्या ११ दिवसानंतर सोमवारी म्हणजेच काल याप्रकरणी पोलीस ठाण्यात गुन्हा दाखल करण्यात आला. पीडित अल्पवयीन तरुणी आणि तिच्या आईने वरिष्ठ पोलीस अधिकाऱ्यांची भेट घेतल्यानंतरच हा गुन्हा दाखल करण्यात आला. पंचायतीच्या पाचही सदस्यांना देखील पोलिसांनी आरोपी केलं असून पॉस्कोअंतर्गत त्यांच्यावर गुन्हा दाखल करण्यात आला आहे. त्यांना ताब्यात घेण्यात आलं आहे. आरोपींपैकी एकाची ओळख पीडितीने पटली असून त्यालाही ताब्यात घेण्यात आलं आहे. इतर आरोपींची ओळख पीडित तरुणी अद्याप पटवू शकलेली नाही”, अशी माहिती मोहनपूर पोलीस ठाण्याचे पोलीस अधिकारी रवीभूषण यांनी दिली आहे. बिहार महिला आयोगाच्या प्रमुख मिश्रा यांनी या घटनेची गांभीर्याने दखल घेत वरिष्ठ पोलीस अधिकाऱ्यांना याप्रकरणी सविस्तर अहवाल तयार करत २ सप्टेंबरच्या आधी सर्व पंचायत सदस्यांना आयोगासमोर हजर करण्यास सांगितले आहे.