पुण्यातील वैष्णवी हगवणे हिचे प्रकरण ताजे असतानाच आता हुंड्यासाठी नोएडा येथील एका विवाहितेची हुंड्यासाठी हत्या करण्यात आल्याचे प्रकरण समोर आले आहे. निक्की असे या महिलेचे नाव होते. तिला सासरच्यांनी पेटवून दिल्याचे समोर आले. हुंड्यात स्कॉर्पिओ, बुलेट बाईक, रोख रक्कम आणि सोने देऊनही, निक्कीच्या वडिलांनी आपली मुलगी गमावली.
"वडिलांच्या नवीन मर्सिडीजवर विपिनची नजर, ६० लाखांची मागणी", निक्कीच्या भावाने मांडली व्यथा
२०१६ मध्ये झालेल्या लग्नात निकीच्या कुटुंबाने तिचा पती विपिन भाटीला जे काही देता येईल ते दिले. पण भाटी कुटुंबाचा लोभ तिथेच संपला नाही. त्यांनी निकीला तिच्या आई-वडिलांकडून आणखी ३६ लाख रुपये आणण्यास सांगितले. जेव्हा निकीच्या कुटुंबाला याची व्यवस्था करता आली नाही, तेव्हा तिचा पती आणि सासू दया यांनी तिला बेदम मारहाण केली आणि तिला जाळून मारले.
निक्की आणि तिची बहीण कांचन यांचे लग्न १० डिसेंबर २०१६ रोजी विपिन आणि रोहित या भावांशी झाले. निक्कीची बहीण कांचनने सांगितले की, आमच्या वडिलांनी एक टॉप मॉडेल स्कॉर्पिओ, रॉयल एनफील्ड बाईक, रोख रक्कम, सोने, सर्वकाही भेट दिली. तसेच, करवा चौथच्या दिवशी आमच्या घरून भेटवस्तू पाठवण्यात आल्या. आमच्या पालकांनी शक्य ते सर्व केले, पण सासरचे लोक खूश नव्हते. ते म्हणायचे की, माझ्या आई-वडिलांनी भेट दिलेल्या कपड्यांची किंमत २ रुपये होती.
आम्ही अनेक रात्री रडत काढल्या
"विपिन आणि रोहित अनेकदा उशिरापर्यंत बाहेर असायचे. ते आमचे फोन उचलत नसत. जेव्हा आम्ही त्यांना विचारायचो की ते कुठे आहेत, तेव्हा ते गोंधळ घालायचे. ते इतर महिलांसोबत वेळ घालवायचे. जेव्हा आम्ही त्यांच्याशी याबद्दल बोलायचो तेव्हा ते आम्हाला मारहाण करायचे. आम्ही आमच्या रात्री रडत घालवायचो. आता काहीही शिल्लक नाही, माझी बहीण गेली आहे. ती माझ्यापेक्षा सुमारे दोन-तीन वर्षांनी लहान होती, असंही निक्कीची बहिण कांचनने सांगितले.
'आम्ही बहिणी मेकअप स्टुडिओ चालवायचो, पण सासरच्या लोकांना ते आवडत नव्हते. ते आमचे सर्व कमाई काढून घ्यायचे. यासाठी आम्हाला मारहाण केली जात असे. जर मी हा व्हिडिओ बनवला नसता तर माझ्या बहिणीचा मृत्यू कसा झाला हे कोणालाही कळले नसते. मी पाणी ओतले, तिला वाचवण्याचा प्रयत्न केला, पण मध्येच बेशुद्ध पडलो, असा गौप्यस्फोट कांचनने केला.