मुंबई: आईच्या प्रियकराने केला मुलीवरच अत्याचार; आरोपीच्या दुसऱ्या प्रेयसीने काढला व्हिडीओ

Mumbai Crime: मुंबईत एका प्रेमी जोडप्यानं अल्पवयीन मुलीवर अत्याचार करून त्याचा व्हिडिओ मोबाईलमध्ये रेकॉर्ड केल्याची घटना समोर आली आहे.

Mumbai Crime:मुंबईतून अत्याचाराची विचित्र अशी घटना समोर आली आहे. मुंबईच्या उपनगरात एका जोडप्याने अल्पवयीन मुलीवर अत्याचार करत विकृतीचा कळस गाठला. आरोपीनं प्रेयसीच्या मदतीने अल्पवयीन मुलीवर लैंगिक अत्याचार केले. एवढ्यावरच न थांबता आरोपीने या सगळ्या प्रकाराचा व्हिडीओ मोबाईलमध्ये शूट केला आणि पीडित मुलीला धमकावले. मुलीने धीर दाखवत तिच्या आईला हा सगळा प्रकार सांगितला आणि हे प्रकरण पोलिसांत गेले. पोलिसांनी या जोडप्याला अटक केली आहे. धक्कादायक बाब म्हणजे आरोपी हा पीडित मुलीच्या आईचा प्रियकर आहे आणि तो त्याच्या दुसऱ्या प्रेयसीसोबत तिथेच राहत होता. 

एका प्रेमी जोडप्याने अल्पवयीन मुलीवर अतिशय क्रूरपणे लैंगिक अत्याचार केल्याचा प्रकार मुंबईच्या उपनगरातून समोर आला आहे. या घटनेचे मोबाइलवर व्हिडीओ बनवल्याचा दावाही या मुलीच्या आईने केला असून, याप्रकरणी पोक्सोसह संबंधित कायद्याअंतर्गत गुन्हा दाखल करून पोलिसांकडून जोडप्याला अटक केली. पोलिसांकडून मिळालेल्या माहितीनुसार, पीडित मुलीची आई एका खासगी कंपनीत काम करते. तिच्या सोबत आरोपी आणि त्याची प्रेयसी देखील काम करते. आरोपी तरुण आणि पीडित मुलीच्या आईचे चार वर्षापासून प्रेमसंबंध जुळल्याने ते एकत्र राहायचे. मात्र, आरोपीचे काही दिवसांपूर्वी दुसऱ्या तरुणीसोबत प्रेम जुळले, तेव्हा ती देखील आरोपी आणि पीडित मुलीच्या आईसोबत एकाच घरात राहू लागली.

१५ जून रोजी पीडित मुलीची आई कामावर असताना, आरोपीने त्याच्या प्रेयसीच्या मदतीने अल्पवयीन मुलीवर लैंगिक अत्याचार केला. आरोपींनी या अत्याचाराचा व्हिडीओ मोबाइलमध्येही शूट केला. याबाबत कोणालाही सांगितल्यास ठार मारू, अशी धमकीही दिली. घाबरलेल्या मुलीने काही दिवसांनी त्या घटनेबाबत आईला सांगितले.

त्यानंतर पीडित मुलीने आणि तिच्या आईने पोलिस ठाणे गाठले. गुन्हा दाखल केल्यानंतर पिडीतेची वैद्यकीय तपासणी करण्यात आली. यामध्ये तिच्यावर लैंगिक अत्याचार झाल्याचे उघड झाले. दोन्ही आरोपींनी काढलेले व्हिडीओ पुरावा मिटवण्याच्या उद्देशाने डिलीट केल्याचा अंदाज पोलिसांकडून व्यक्त होत आहे. त्याची शहानिशा करण्यासाठी मोबाइल न्याय वैद्यकीय प्रयोगशाळेत पाठविण्यात आल्याचे अधिकाऱ्यांनी सांगितले.