बेपत्ता झालेल्या राजा आणि सोनमची करण्यात आली होती रेकी, दुचाकीचे लोकेशन आले समोर

Raja Raghuvanshi and Sonam: इंदौरमधील राजा रघुवंशी आणि सोनम यांच्या बेपत्ता होण्याचे गूढ अद्यापही उलगडलेले नाही. पोलीस या प्रकरणात तपास करत असून एक नवीन माहिती समोर आली आहे. 

Raja Raghuvanshi and Sonam Latest News: हनिमूनसाठी मेघालयातील शिलाँग येथे गेलेल्या राजा रघुवंशी आणि सोनम या जोडप्यासोबत काय घडले, याबद्दलचे गूढ अजूनही उलगडलेले नाही. पोलीस या प्रकरणात तपास करत असून, वेगवेगळी माहिती आता समोर येत आहे. दोघांचा हॉटेलमध्ये जातानाचा एक व्हिडीओ मिळाला. त्यानंतर त्यांच्या दुचाकीचे लोकेशन समोर आले असून, त्यांची रेकी केली गेली, असेही समोर आले आहे. 

'लोकमत'चं WhatsApp चॅनल फॉलो करा!

राजा रघुवंशी आणि सोनम यांनी शिलाँगमध्ये पोहोचल्यानंतर एक दुचाकी भाड्याने घेतली होती. अॅक्टिवा घेऊन ते फिरायला गेले होते. त्यांच्या दुचाकीचे शेवटचे लोकेशन आता मिळाले आहे. दुपारी दोन वाजता गाडीचा वेग शून्य झाला होता. 

वाचा >>३ वर्षाच्या चिमुकलीचं अपहरण करून बलात्कार; २४ तासांत पोलिसांनी नराधमाला यमसदनी धाडले

गाडीच्या जीपीएस लोकेशन दिसले आहे. जीपीएस लोकेशननुसार २ वाजता सोनम आणि राजासोबत ही काहीतरी विचित्र घटना घडली. त्यापूर्वी दोघांची काही गुंडांनी रेकीही केली होती. त्यामुळे दोन ते अडीच वाजेच्या दरम्यान दोघांसोबत काहीतरी घडले असे प्राथमिक तपासातून समोर आले आहे. 

राजा रघुवंशीची हत्या करण्यात आली आहे. हत्या करून त्याचा मृतदेह फेकून देण्यात आला. तर सोनम अजूनही बेपत्ता आहे. त्यामुळे तिचे अपहरण झाले आहे का? याचाही तपास पोलीस करत आहेत. 

परत येताना राजाने आईला केला होता कॉल

पोलिसांनी दिलेल्या माहितीनुसार, दुपारी १२.३७ वाजता सोनमने तिच्या आईला कॉल केला होता. दोघी दोन मिनिटे बोलल्या. त्यानंतर डोंगरावरून परत येताना राजाने १ वाजून १३ मिनिटांनी त्याच्या आईला कॉल केला होता. ते त्यांचे शेवटचे संभाषण होते. 

दरम्यान, राजा रघुवंशीचा मृतदेह इंदौरला आणण्यात आला. त्याच्या पार्थिवावर अंत्यसंस्कारही करण्यात आले आहेत. सोनमच्या वडिलांनी पुजाऱ्याच्या सांगण्यावरून तिचा फोटो घराच्याबाहेर उलटा लावला आहे. सध्या शिलाँग पोलीस सोनमचा शोध घेत असून, तिचा भाऊही पोलिसांच्या मदतीसाठी गेला आहे.