धक्कादायक! कुऱ्हाडीने घाव घालून आधी केली बायकोची हत्या; गळफास घेत नवऱ्याची आत्महत्या

Pune Crime News : भारती विद्यापीठ पोलीस ठाण्यात याप्रकरणी गुन्हा दाखल करण्यात आला आहे.

धनकवडी - चारित्र्याच्या संशयावरुन पतीने पत्नीचा कुऱ्हाडीने घाव घालत खून केला. यानंतर त्याने स्वत: साडीच्या साह्याने गळफास घेत आत्महत्या केली. ही खळबळजनक घटना कात्रज येथील मांगडेवाडी येथे घडली. याप्रकरणी भारती विद्यापीठ पोलीस ठाण्यात गुन्हा दाखल करण्यात आला आहे. अनिता तुकाराम कोरे, वय ३२ वर्षे, तुकाराम गंगाधर कोरे, वय ४० वर्षे राहणार सुंदरबन, मांगडेवाडी, कात्रज असे मयत पती पत्नीचे नाव आहे. ही घटना शनिवारी सकाळी उघडकीस आली. 

पोलिसांनी पतीविरुद्ध गुन्हा दाखल केला आहे. याप्रकरणी अनिताची बहिण व तुकारामची पत्नी जगदेवी कोरे हिने फिर्याद दाखल केली आहे. तुकाराम कोरे हा रिक्षा चालक होता तर अनिता ही एका रुग्णालयात हाऊस किपींगचे काम करत होती. फिर्यादी जगदेवी कोरे आणी तुकाराम कोरे हे पती पत्नी होते. तर अनिता ही जगदेवीची बहीण होती. तुकारामने नऊ वर्षापुर्वी अनिताच्या गळ्यात हार घालून घरातच तीच्याशी विवाह केला होता. तेव्हापासून तिघेही एकत्रच राहत होते. 

तुकारामला दोन्ही पत्नींपासून चार मुलेही आहेत. दरम्यान मागील तीन महिन्यांपासून तुकाराम अनितावर चारित्र्याचा संशय घेत होता. तेव्हापासून त्यांच्यामध्ये वादावादी होत होती. याच कारणावरुन त्यांच्यामध्ये शुक्रवारी रात्री भांडणे झाली. तुकारामने रागाच्या भरात अनितावर कुऱ्हाडीने वार करुन तीचा खून केला. यानंतर त्याने स्वत: घरातील लोखंडी अँगलला साडी बांधून गळफास घेतला. ही घटना जगदेवीने पोलिसांना सांगितली. यानंतर घटनास्थळी उपायुक्त सागर पाटील, सहायक पोलीस आयुक्त सर्जेराव बाबर, वरिष्ठ पोलीस निरीक्षक जगन्नाथ कळसकर, पोलीस निरीक्षक प्रकाश पासलकर, सहायक पोलीस निरीक्षक गंगाधर घावटे, वैभव गायकवाड, उपनिरीक्षक समाधान मचाले यांनी भेट दिली.