"प्रेम करतोस तर जीव देऊन दाखव"; गर्लफ्रेंडची मागणी बॉयफ्रेंडनं पूर्ण केली! तरुणाचा दुर्दैवी अंत

एकतर्फी प्रेमामुळे एका १९ वर्षीय तरुणाला आपला जीव गमवावा लागला. या तरुणाने, प्रेयसीने "माझ्यासाठी मर" असे म्हटल्यानंतर विषारी पदार्थ पिऊन आत्महत्या केली.

बिहारच्या भागलपूर जिल्ह्यातून एक अत्यंत हृदयद्रावक घटना समोर आली आहे, जिथे एकतर्फी प्रेमामुळे एका १९ वर्षीय तरुणाला आपला जीव गमवावा लागला. दीपक नावाच्या या तरुणाने, प्रेयसीने "माझ्यासाठी मर" असे म्हटल्यानंतर विषारी पदार्थ पिऊन आत्महत्या केली.

मृत तरुण दीपक हा बांका जिल्ह्यातील अमरपूर येथील धनंजय मंडल यांचा एकुलता एक मुलगा होता. दीपक भागलपूरमधील खंजरपूर येथे भाड्याच्या घरात राहत होता आणि एका खासगी क्लिनिकमध्ये काम करत होता. एका महिन्यापूर्वी एका लग्न समारंभात त्याची एका मुलीशी ओळख झाली. ही ओळख लवकरच मैत्रीत बदलली आणि दीपक त्या मुलीच्या प्रेमात पडला.

दीपकचा मित्र मनीषच्या म्हणण्यानुसार, त्या मुलीला भेटून एक महिन्यापेक्षा कमी वेळ झाला होता. ७ मे रोजी झालेल्या भेटीनंतर अवघ्या १० दिवसांत ते दोघे सोशल मीडियावर बोलू लागले. मुलीने दीपककडून तब्बल ५० हजार रुपये खर्च करून घेतल्याचे मनीषने सांगितले. यानंतर काही दिवसांनी मुलीने दीपकशी बोलणे बंद केले, ज्यामुळे दीपक खूप अस्वस्थ झाला.

म्हणाली "माझ्यासाठी मर"!
मुलीने अचानक संपर्क तोडल्याने दीपक प्रचंड मानसिक दबावाखाली होता. त्याच्या मृत्यूनंतर मित्रांनी तपासले असता, दीपकने मुलीच्या सोशल मीडिया चॅट बॉक्समध्ये वारंवार विनंत्या केल्याचे समोर आले. "माझ्याशी बोल" असे दीपकने अनेकदा लिहिले होते. यावर मुलीने दिलेले उत्तर धक्कादायक होते – "जर तू माझ्यावर प्रेम करतोस तर सिद्ध कर, माझ्यासाठी मर..." या मेसेजनंतरच दीपकने विषारी पदार्थ प्राशन केले.

दीपकला तात्काळ मायागंज रुग्णालयात दाखल करण्यात आले, परंतु उपचारादरम्यान त्याचा मृत्यू झाला. मृताच्या वडिलांनी पोलिसांना दिलेल्या जबाबात अद्याप कोणालाही दोषी ठरवलेले नाही आणि गुन्हाही नोंदवलेला नाही.