तो झाला वेडा पिसा...विवाहित महिलेवर जबरदस्ती; स्वतःच्या हाताच्या नसा कापून आत्महत्या करण्याचाही प्रयत्न
By ऑनलाइन लोकमत | Published: March 23, 2021 03:07 PM2021-03-23T15:07:11+5:302021-03-23T15:08:02+5:30
Suicide Attempt : दीपक संजय पाटील (वय २७) असे आरोपीचे नाव आहे. तो जळगाव जिल्ह्यातील येनगाव (बोदवड) येथील रहिवासी आहे.
तो झाला वेडा पिसा...विवाहित महिलेवर जबरदस्ती; स्वतःच्या हाताच्या नसा कापून आत्महत्या करण्याचाही प्रयत्न
नागपूर : विवाहित महिलेच्या प्रेमात वेडापिसा झालेल्या एका तरुणाने स्वतःच्या हाताच्या नसा कापून आत्महत्या करण्याचा प्रयत्न केला. बेलतरोडी पोलीस ठाण्याच्या हद्दीत सोमवारी दुपारी ही घटना घडली.
दीपक संजय पाटील (वय २७) असे आरोपीचे नाव आहे. तो जळगाव जिल्ह्यातील येनगाव (बोदवड) येथील रहिवासी आहे. बेलतरोडीतील दोन मुलांची आई असलेल्या ३५ वर्षाच्या एका महिलेसोबत त्याची फेसबुकवर ओळख झाली. नंतर टॅक्सी ड्रायव्हर असलेला पाटील गेल्यावर्षी नागपुरात आला. त्याने महिलेशी संपर्क साधून तिचा पत्ता जानून घेतला आणि तिच्या घरी पोहोचला. तेथे त्याने जाणे-येणे वाढवल्याने या दोघांचे सूत जुळवले. बरेच दिवस त्यांचे अनेतिक संबंध गुपचूप सुरु होते. ३० जुलै २०२० ला त्याने या महिलेला जळगावला पळवून नेले. महिलेच्या नवऱ्याने बेलतरोडी पोलीस ठाण्यात तक्रार नोंदवली. पोलिसांनी मोबाईल वरून माग काढून जळगाव गाठले. तेथे त्यांनी महिलेला विचारपूस केली असता मी स्वमर्जीने पाटीलसोबत आली आणि आता मला परत यायचे नाही. पाटील सोबतच राहायचे आहे, असे तिने सांगितले. त्यामुळे पोलीस हात हलवत परत आले. दरम्यान, तब्बल सात महिने हे दोघे जळगावला पती-पत्नी सारखे राहत होते. नंतर त्यांच्यात खटके उडाल्याने तीन आठवड्यापूर्वी ही महिला नागपुरात आपल्या घरी परतली. मोठ्या मनाच्या नवऱ्यानेही तिला स्विकारले आणि घरी ठेवून घेतले. सर्व सुरळीत असताना आता तीन दिवसांपूर्वी पाटील पुन्हा नागपुरात परतला. त्याने महिलेचे घर गाठले. तेथेच दोन दिवस मुक्काम ठोकला आणि तिला सोमवारी दुपारी आपल्या सोबत जळगावला घेऊन जाण्यासाठी जबरदस्ती करू लागला. महिलेने नकार दिला. त्यामुळे त्याने तिच्याशी वाद घालून तिच्या घरातील भाजी कापण्याच्या चाकूने आपल्या दोन्ही हाताच्या नसा कापून घेतल्या. या प्रकारामुळे घाबरलेल्या महिलेने आरडाओरड केली. तर तिच्या पतीने बेलतरोडी पोलिसांना माहिती दिली. ठाणेदार विजय आकोत यांनी आपल्या सहकाऱ्यांसह घटनास्थळी पोहचून जखमी आरोपी पाटीलवर उपचार करून घेतले. त्यानंतर महिलेच्या पतीच्या तक्रारीवरून त्याने आरोपी पाटील विरुद्ध आत्महत्या करण्याचा प्रयत्न केल्याच्या आरोपाखाली गुन्हा दाखल केला.
... हिच्या वाचून करमेना !
पोलिसांनी आरोपी पाटीलला विचारणा केली असता त्याने 'हिच्या वाचून मी जगू शकत नाही. मला करमतच नाही,' असे सांगितले. पोलिसांनी त्याची कशीबशी समजूत घालून त्याला जळगावला पाठवून दिले.
