फेसबुकवरची मैत्री कमिशनच्या आमिषाने पडली महागात 

Fraud Case : महिलेने दागिने गहाण ठेऊन दिले ४ लाख 

ठळक मुद्दे५ जुलै रोजी त्याने तिला कॉल करून दिल्ली विमानतळावर आपणास कस्टमच्या अधिकाऱ्यांनी पकडले असून माझ्याकडे भारतीय चलन नसल्याने ५० हजार त्वरित पाठवा सांगितले.

मीरारोड - भाईंदरच्या महिलेने फेसबुक वरून केलेली मैत्री आणि लंडनच्या त्या कथित मित्राने ५ लाख युरो डॉलरची जमीन खरेदीत दिलेल्या कमिशनच्या आमिषाला बळी पडलेल्या त्या महिलेची ४ लाखांना फसगत झाली. त्यासाठी तिला स्वतःचे दागिने गहाण ठेवावे लागले. 

भाईंदर पूर्वेला न्यू गोल्डन नेस्ट भागात राहणाऱ्या वैशाली मनीष राजा यांची फेसबुकवर जॉन्सन मायलो या स्वतःला लंडनचा रहिवासी व अभियंता म्हणवणाऱ्याशी मैत्री झाली . दोघांची फेसबुक व नंतर व्हॉट्सएप वरून चॅटिंग सुरु झाले. त्याने ५ जुलै रोजी भारतात येणार सांगत तसे तिकीट पाठवले व आपण ५ लाख युरो डॉलरची जमीन खरेदी करणार असून त्यातले कमिशन तुम्हाला देईन असे सांगितले. 

५ जुलै रोजी त्याने तिला कॉल करून दिल्ली विमानतळावर आपणास कस्टमच्या अधिकाऱ्यांनी पकडले असून माझ्याकडे भारतीय चलन नसल्याने ५० हजार त्वरित पाठवा सांगितले. त्यानुसार बँक खात्यातून तिने ५० हजार पाठवले. त्याने नंतर परत कॉल करून आणखी साडे तीन लाख मागितले. त्यासाठी तिने स्वतःचे मंगळसूत्र , चैन, कडा व हार असे दागिने सराफा कडे गहाण ठेवत ते पैसे बँक खात्याद्वारे पाठवले. 

काही वेळाने त्याने पुन्हा कॉल करत आणखी १५ लाखांची मागणी केली . पैसे दिले नाहीस तर मला जेल मध्ये टाकतील व मी मरेन. पण आपले शेवटचे संभाषण असल्याने त्याला तू जबाबदार असशील असा कांगावा त्याने केला . तिने कोणते पोलीस आहेत माझ्याशी बोलणे करून दे सांगितल्यावर ते त्याने टाळले . अखेर फसवणूक झालेल्या वैशाली ने १९ ऑक्टोबर रोजी नवघर पोलीस ठाण्यात फिर्याद दिल्यावर पोलिसांनी फसवणुकीचा गुन्हा दाखल केला आहे .