ईडीने धनकुबेराच्या घरीच छापा मारला; रोकड सोडा, दागिनेच एवढ्या कोटींचे सापडले की... घबाड पाहून अधिकारीही अवाक्

ED Raid Delhi: सध्या हा धनकुबेर फरार असून दुबईला लपला असल्याचे समजते आहे. त्याच्याविरोधात उत्तर प्रदेश, हरियाणामध्ये १५ हून अधिक फसवणुकीचे धमकावण्याचे आणि जबरदस्तीने वसुलीचे गुन्हे दाखल आहेत.

नवी दिल्ली: नवीन वर्षाच्या पहिल्याच दिवशी अंमलबजावणी संचालनालयाने (ED) भ्रष्टाचाराविरोधात मोठी कारवाई केली आहे. दिल्लीतील प्रथितयश नाव असलेल्या इंद्रजित सिंह यादव यांच्या निवासस्थानी आणि कार्यालयांवर ईडीने छापे टाकले. या कारवाईत ईडीच्या हाती 'कुबेराचे धन' लागले असून, तब्बल ५ कोटी रुपयांची रोकड आणि ८ कोटी रुपये किमतीचे सोन्या-चांदीचे दागिने जप्त करण्यात आले आहेत.

इंद्रजित सिंह यादव यांच्याशी संबंधित दिल्लीतील विविध ठिकाणांवर ईडीच्या पथकाने मंगळवारी पहाटेपासूनच शोधमोहीम सुरू केली होती. आर्थिक गैरव्यवहार आणि बेहिशोबी मालमत्तेच्या संशयावरून ही कारवाई करण्यात आल्याचे समजते. धाडीदरम्यान सापडलेली रोकड मोजण्यासाठी ईडीला मशीन मागवावे लागले होते. एवढेच नाही तर दागिन्यांचे वजन आणि त्यांची किंमत काढण्यासाठी देखील सोनाराला मशीनसह बोलवावे लागले होते. 

सध्या हा धनकुबेर फरार असून दुबईला लपला असल्याचे समजते आहे. त्याच्याविरोधात उत्तर प्रदेश, हरियाणामध्ये १५ हून अधिक फसवणुकीचे धमकावण्याचे आणि जबरदस्तीने वसुलीचे गुन्हे दाखल आहेत. 

जप्त करण्यात आलेली मालमत्ता:

रोख रक्कम: अंदाजे ५ कोटी रुपये (चलनी नोटांच्या बंडल्सच्या स्वरूपात).

दागिने: सुमारे ८ कोटी रुपये किमतीचे हिरे आणि सोन्याचे दागिने.

कागदपत्रे: अनेक महत्त्वाच्या मालमत्तांची कागदपत्रे आणि डिजिटल पुरावे ईडीने ताब्यात घेतले आहेत.

तपासाची व्याप्ती वाढणार? 
इंद्रजित सिंह यादव यांच्याकडे एवढ्या मोठ्या प्रमाणात रोकड आणि दागिने कोठून आले, याचा तपास आता ईडी करत आहे. या प्रकरणात काही बड्या नेत्यांची किंवा व्यावसायिकांची नावे समोर येण्याची शक्यता वर्तवण्यात येत आहे. ईडीच्या या कारवाईमुळे दिल्लीतील राजकीय आणि व्यावसायिक वर्तुळात मोठी खळबळ उडाली आहे. सध्या ईडीचे अधिकारी जप्त केलेल्या कागदपत्रांची पडताळणी करत असून, यादव यांची चौकशी केली जाण्याची शक्यता आहे. या धाडीमुळे नवीन वर्षाच्या सुरुवातीलाच तपास यंत्रणांनी भ्रष्टाचाऱ्यांविरुद्ध कडक पवित्रा घेतल्याचे स्पष्ट झाले आहे.