धूम स्टाईलने तरुणाच्या हातातून मोबाईल लांबविला

Crime News : एरंडोल तालुक्यातील वरखेडी येथील अतुल शांताराम मराठे (वय २१) हा तरुण कल्याण येथे ॲमेझॉन कंपनीत असोसिएट वर्कर म्हणून नोकरीस आहे.

जळगाव : रस्त्याने पायी जाणाऱ्या तरुणाच्या हातातून मागून दुचाकीवरून आलेल्या तिघांनी धूम स्टाईलने मोबाईल चोरून नेल्याची घटना सोमवारी रात्री ९ वाजेच्या सुमारास शहरातील बालनिरीक्षणगृहाजवळ घडली. याप्रकरणी जिल्हा पेठ पोलीस ठाण्यात गुन्हा दाखल करण्यात आला आहे.

एरंडोल तालुक्यातील वरखेडी येथील अतुल शांताराम मराठे (वय २१) हा तरुण कल्याण येथे ॲमेझॉन कंपनीत असोसिएट वर्कर म्हणून नोकरीस आहे. सुट्टीवर असल्याने तो १ एप्रिल रोजी घरी आला होता. दरम्यान, ४ एप्रिल रोजी कल्याण जाण्यासाठी तो जळगावातील आकाशवाणी चौकात ट्रकने आला. त्यानंतर आकाशवाणी चौकाकडून ते रेल्वे स्टेशनकडे पायी निघाला.

बालनिरीक्षणगृहाजवळून जात असताना त्याने रेल्वेचे लोकेशन बघण्यासाठी आपला मोबाईल खिशातून बाहेर काढला. त्याचवेळी मागून दुचाकीवरून आलेल्या दोघांपैकी मागे बसलेल्या एका तरुणाने अतुलच्या हाताला झटका मारीत मोबाईल हिसकावून नेला. त्याने लागलीच तत्काळ जिल्हा पेठ पोलिसात धाव घेत संपूर्ण हकीकत पोलिसांना सांगितली. त्यानंतर मंगळवारी सकाळी तक्रारीवरून गुन्हा दाखल करण्यात आला आहे.