काजलला लागलेली नवऱ्याच्या काळ्या धंद्यांची कुणकुण? कुटुंबियांचा खळबळजनक आरोप

काजलच्या हत्येनंतर आता सोनीपत येथील तिच्या नातेवाईकांनी असे आरोप केले आहेत, ज्यामुळे हे संपूर्ण प्रकरण अधिकच खळबळजनक झालं आहे.

दिल्लीपोलिसांच्या महिला कमांडो काजलचा मृत्यू आता केवळ एक हत्या राहिलेली नाही, तर एकामागून एक उलगडणाऱ्या अनेक गोष्टी याची भीषणता दाखवत आहेत. काजलच्या हत्येनंतर आता सोनीपत येथील तिच्या नातेवाईकांनी असे आरोप केले आहेत, ज्यामुळे हे संपूर्ण प्रकरण अधिकच खळबळजनक झालं आहे. नातेवाईकांचं म्हणणं आहे की, काजलकडे तिचा पती अंकुर याच्याशी संबंधित अनेक मोठी आणि धक्कादायक गुपितं होती. 

अंकुर केवळ काजलच्या हत्येचा आरोपी नाही, तर तो 'पेपर लीक' करणाऱ्या एका मोठ्या रॅकेटचा मास्टरमाइंड देखील आहे. नातेवाईकांच्या मते, अंकुर उमेदवारांकडून लाखो रुपये उकळायचा आणि एका लॅब चालकासोबत मिळून पेपर लीक करण्याचा व्यवसाय चालवत होता. या अवैध व्यवसायातून त्याने कोट्यवधी रुपये कमावल्याचा दावाही करण्यात आला आहे.

डम्बेलने मारहाण करून हत्या

नातेवाईकांनी दिलेल्या माहितीनुसार, २२ जानेवारी रोजी काजलचं तिच्या आई आणि वहिनीशी व्हिडीओ कॉलवर बोलणं झालं होतं. त्यावेळी काजल सामान्य दिसत होती, मात्र काही तासांतच तिची निर्घृण हत्या केली जाईल, याची पुसटशी कल्पनाही कोणाला नव्हती. जिममध्ये वापरल्या जाणाऱ्या डम्बेलने मारहाण करून काजलला मृत्यूच्या दारात ढकलल्याचा आरोप आहे.

"मी तुझ्या बहिणीला मारतोय, किंकाळ्या ऐकून काळजाचं पाणी..."; स्वाट कमांडोचा 'तो' फोन कॉल

प्रेमविवाहामुळे अंकुरच्या घरचे होते नाराज

काजलचं आयुष्य संघर्षाने भरलेलं होतं. दिल्लीपोलिसांत कमांडो बनण्यामागे तिची मेहनत आणि जिद्द होती. अंकुरची बहीण आधी काजलची मैत्रीण होती, तिच्या माध्यमातूनच काजल आणि अंकुरची ओळख झाली. हळूहळू या ओळखीचे रूपांतर प्रेमात झालं आणि काजलने आपल्या कुटुंबाला मनवून प्रेमविवाह केला. मात्र, हे लग्न अंकुरच्या कुटुंबाला मान्य नव्हतं असा आरोप नातेवाईकांनी केला आहे.

चार महिन्यांची गर्भवती

लग्नानंतर काही काळातच काजलचा हुंड्यासाठी छळ सुरू झाला. अंकुर आणि त्याचे कुटुंब तिच्यावर सतत दबाव टाकत असल्याचा आरोप आहे. असे असूनही, काजल आपल्या प्रेमासाठी सर्व काही सहन करत राहिली. ती शांत राहिली, वेदना सोसल्या आणि आपलं नातं वाचवण्याचा प्रयत्न करत राहिली. ज्यावेळी काजलची हत्या झाली, तेव्हा ती चार महिन्यांची गर्भवती होती. तिला दीड वर्षाचा एक मुलगा देखील आहे.