दुसऱ्या पुरुषाच्या प्रेमात वेडी झाली सून; सासूने टोकले म्हणून भरदिवसा संपवले!

आपल्या अनैतिक संबंधांच्या मार्गात अडथळा ठरत असलेल्या ६९ वर्षीय सासूची सुनेनेच प्रियकराच्या मदतीने निर्घृण हत्या केली.

नवाबांच्या शहरात म्हणजेच लखनऊमध्ये नात्याला काळिमा फासणारी एक संतापजनक घटना समोर आली आहे. आपल्या अनैतिक संबंधांच्या मार्गात अडथळा ठरत असलेल्या ६९ वर्षीय सासूची सुनेनेच प्रियकराच्या मदतीने निर्घृण हत्या केली. लखनऊच्या निशातगंज परिसरात शनिवारी भरदिवसा ही घटना घडली. धक्कादायक बाब म्हणजे, मृत निर्मला देवी या सचिवालयातून निवृत्त झाल्या होत्या. त्यांचा राहत्या घरात हात-पाय बांधलेल्या अवस्थेत त्यांचा मृतदेह आढळल्याने परिसरात मोठी खळबळ उडाली आहे.

मुलाने उघडले दार अन् पायाखालची जमीन सरकली!

निशातगंज गल्ली क्रमांक ३ मध्ये निर्मला देवी आपल्या मुलाचा परिवार, सून रंजना आणि नातवंडांसह राहत होत्या. शनिवारी दुपारी ४ च्या सुमारास त्यांचा नातू आदित्य कामावरून घरी परतला. घराचा दरवाजा उघडा नसल्याने त्याने कसाबसा आत प्रवेश केला. समोरचे दृश्य पाहून त्याच्या काळजाचा ठोका चुकला. त्याची आजी निर्मला देवी जमिनीवर मृतावस्थेत पडल्या होत्या. त्यांचे हात-पाय दोरीने बांधलेले होते आणि गळ्यावर आवळल्याच्या खुणा स्पष्ट दिसत होत्या.

सुनेचे लफडे अन् सासूचा जीव गेला!

घटनेची माहिती मिळताच पोलिसांनी घटनास्थळी धाव घेत तपास सुरू केला. सुरुवातीलाच सून रंजनाचे वागणे पोलिसांना संशयास्पद वाटले. सखोल चौकशीत समोर आले की, रंजनाचे एका बाहेरील व्यक्तीसोबत प्रेमसंबंध होते. सासू निर्मला देवी यांना या प्रकाराची कुणकुण लागली होती आणि त्या वारंवार रंजनाला टोकून या नात्याचा विरोध करत होत्या. आपल्या प्रेमाच्या आड येणाऱ्या सासूचा काटा काढण्यासाठी रंजनाने प्रियकरासोबत मिळून हा क्रूर कट रचला.

घरात कोणी नसताना साधली संधी

घटनेच्या वेळी निर्मला देवी यांचा मुलगा त्रिदेश ड्युटीवर होता. घरात केवळ रंजना आणि तिची धाकटी मुलगी होती, तर मोठी मुलगी आजोळी उन्नावला गेली होती. याच संधीचा फायदा घेत रंजनाने आपल्या प्रियकराला बोलावून घेतले आणि निर्मला देवींचा गळा आवळून त्यांना संपवले.

पोलीस कारवाई आणि पुढील तपास

लखनऊ पोलिसांनी मुख्य आरोपी सून रंजनाला ताब्यात घेतले असून तिची कसून चौकशी केली जात आहे. फॉरेन्सिक टीमने घटनास्थळावरून ठसे आणि इतर पुरावे गोळा केले आहेत. रंजनाचा फरार प्रियकर अद्याप पोलिसांच्या हाती लागलेला नाही, त्याच्या शोधासाठी ठिकठिकाणी छापेमारी सुरू आहे.