नवी दिल्ली - बिहारमध्ये माणुसकीला काळीमा फासणारी एक घटना घडली आहे. तब्बल 9 महिने एका अल्पवयीन मुलीवर बलात्कार करण्यात आला आहे. मैत्रिणीच्या चुलत भावानेच हे कृत्य केलं आहे. धक्कादायक बाब म्हणजे नराधमाने क्रूरतेचा कळस गाठला आहे. बलात्कार केल्यानंतर पीडितेच्या छातीवर चाकूने आपलं नावं कोरलं आहे. तसेच याचा एक व्हिडीओही तयार केला. यानंतर आरोपीने संबंधित व्हिडीओ व्हायरल करण्याची धमकी देत मुलीवर तब्बल नऊ महिने बलात्कार केला. या भयंकर घटनेने परिसरात एकच खळबळ उडाली आहे.
पोलिसांनी दिलेल्या माहितीनुसार, बिहारच्या बेतिया जिल्ह्यातील एका गावात हे मन सुन्न करणारी घटना घडली आहे. साधारण वर्षभरापूर्वी या धक्कादायक प्रकाराला सुरुवात झाली. पीडित मुलगी इयत्ता नववीची विद्यार्थिनी असून ती ऑक्टोबर 2020 मध्ये आपल्या एका मैत्रिणीच्या घरी गेली होती. यावेळी मैत्रिणीचा चुलत भावाने पीडितेवर बलात्कार केला. तसेच बलात्कार झाल्यानंतर आरोपीने चाकूने पीडितेच्या छातीवर स्वत:चं नाव देखील कोरलं. या धक्कादायक घटनेचे व्हिडीओ आणि फोटो देखील काढले.
फोटो आणि व्हिडीओच्या आधारे आरोपीने पीडितेवर तब्बल 9 महिने बलात्कार केला आहे. तसेच पीडितेला घरातून पैसे आणून देण्यासाठी दबाब देखील टाकला जात होता. यामुळे पीडितेने आपल्याच घरात चोरी करून आरोपीला 50 हजार रुपयांची रोख रक्कम आणि काही दागिने दिले. तरीही तिच्यासोबत होणारा अत्याचार थांबला नाही. पण गेल्या महिन्यात पीडित मुलगी आपल्या आई वडिलांकडे दिल्लीला गेल्यानंतर तिने तिच्यासोबत घडलेल्या सर्व प्रकार आपल्या आईला सांगितला आहे.
पीडितेच्या कुटुंबीयांनी रामनगर पोलीस ठाण्यात मुख्य आरोपी शुभम गुप्ता ऊर्फ सन्नी, मैत्रीण आर्या सिंह यांच्यासह सहा जणांवर गुन्हा दाखल करण्यात आला आहे. याबाबत माहिती देताना पोलिसांनी संबंधित घटना एक वर्षापूर्वीची आहेत. त्यामुळे याचा अधिक तपास केला जात असल्याचं म्हटलं आहे. तसेच पीडित मुलीची वैद्यकीय चाचणी देखील करण्यात येणार आहे. देशात महिलांवरील अत्याचाराच्या, बलात्काराच्या घटनेत सातत्याने वाढ होत आहे. एका हिंदी वेबसाईटने याबाबतचे वृत्त दिले आहे.