१२०० सीसीटीव्ही आणि १०० संशयित; CID मधील महिला अधिकाऱ्याच्या लुटणाऱ्याचा एन्काऊंटर, दोघे फरार

सीआयडीमधील महिला अधिकाऱ्याला लुटणाऱ्या आरोपीचा पोलिसांनी इन्काऊंटर केला.

UP Crime: उत्तर प्रदेशातील कानपूरमध्ये एका महिला पोलीस उपनिरीक्षकाची चेन लुटणाऱ्या गुंडांचा माज पोलिसांनी उतरवला आहे. २२ जानेवारीच्या रात्री उशिरा पोलीस आणि आरोपींमध्ये झालेल्या जोरदार चकमकीत एका आरोपीच्या पायाला गोळी लागली असून, पोलिसांनी त्याला अटक केली आहे. धक्कादायक म्हणजे, या टोळीने साध्या नागरिकांनाच नव्हे, तर सीआडीमध्ये कार्यरत असलेल्या महिला दरोड्याला लुटण्याचे धाडस केले होते.

८ जानेवारी रोजी कानपूरच्या रावतपूर भागातील केशवपुरममध्ये ही घटना घडली होती. सीआयडीमध्ये कार्यरत असलेल्या महिला उपनिरीक्षक मंजूलता दुबे या दुपारी पूजा आटोपून घराबाहेर धूप शेकण्यासाठी उभ्या होत्या. त्याचवेळी एका दुचाकीवरून दोन तरुण आले. त्यांनी रस्ता विचारण्याच्या बहाण्याने महिला अधिकाऱ्याला बोलण्यात गुंतवले आणि त्यांच्या गळ्यातील सोन्याची साखळी हिसकावून त्यांना जमिनीवर जोरात ढकलून दिले. ही संपूर्ण घटना सीसीटीव्ही कॅमेऱ्यात कैद झाली होती.

१२०० सीसीटीव्ही कॅमेरे आणि १०० संशयित

एका महिला पोलीस अधिकाऱ्याला लुटल्याने कानपूर पोलिसांच्या प्रतिष्ठेचा प्रश्न निर्माण झाला होता. पोलीस उपायुक्त कासिम आबिदी यांच्या नेतृत्वाखाली पोलिसांनी तपासाचे चक्र फिरवले. या गुन्ह्याची उकल करण्यासाठी पोलिसांनी तब्बल १२०० सीसीटीव्ही कॅमेऱ्यांचे फुटेज खंगाळले आणि १०० हून अधिक संशयितांची चौकशी केली. या मेहनतीनंतर पोलिसांना आरोपींच्या लोकेशनची माहिती मिळाली.

मध्यरात्रीची चकमक 

२२ जानेवारीच्या रात्री दलहन चौकाजवळ पोलीस चेकिंग करत असताना एक संशयास्पद दुचाकी येताना दिसली. पोलिसांनी इशारा देऊनही दुचाकीस्वारांनी वेग वाढवला आणि पळू लागले. पोलिसांनी पाठलाग सुरू करताच आरोपींनी पोलिसांच्या दिशेने अंदाधुंद गोळीबार सुरू केला. स्वसंरक्षणार्थ पोलिसांनी केलेल्या गोळीबारात एका आरोपीच्या उजव्या पायाला गोळी लागली आणि तो जागीच कोसळला.

आरोपीची ओळख पटली

पकडण्यात आलेल्या आरोपीचे नाव नियाज अहमद असून तो गोंडा जिल्ह्याचा रहिवासी आहे. चकमकीनंतर त्याला तातडीने सामुदायिक आरोग्य केंद्रात दाखल करण्यात आले आहे. पोलिसांनी त्याच्याकडून २ देशी बनावटीची पिस्तुलं, २ जिवंत काडतूसे, ४,५०० रुपये रोख रोख जप्त केले.

दोन आरोपी अद्याप फरार

या चकमकीदरम्यान अंधाराचा फायदा घेत विजय नावाचा एक आरोपी आणि त्याचा आणखी एक साथीदार पळून जाण्यात यशस्वी झाले. पोलीस सध्या या दोघांचा शोध घेत असून, लवकरच त्यांनाही अटक करण्यात येईल, असा विश्वास डीसीपी कासिम आबिदी यांनी व्यक्त केला आहे.