भाजपा खासदार आणि प्रसिद्ध गायक मनोज तिवारी यांच्या मुंबईतील निवासस्थानी ५.४० लाख रुपयांची चोरी झाल्याची धक्कादायक घटना उघडकीस आली आहे. अंधेरी पश्चिम येथील शास्त्रीनगर परिसरातील 'सुंदरबन अपार्टमेंट'मध्ये ही चोरी झाली असून, त्यांच्याच एका जुन्या कर्मचाऱ्याने ही चोरी केल्याचं समोर आलं आहे.
याप्रकरणी मनोज तिवारी यांचे मॅनेजर प्रमोद जोगेंदर पांडेय यांनी आंबोली पोलीस ठाण्यात तक्रार दाखल केली आहे. पोलिसांनी तातडीने कारवाई करत आरोपी सुरेंद्रकुमार दीनानाथ शर्मा याला अटक केली आहे. आरोपी सुरेंद्रकुमार याला सुमारे दोन वर्षांपूर्वी नोकरीवरून काढून टाकण्यात आलं होतं.
अशी झाली चोरी
आंबोली पोलिसांनी दिलेल्या माहितीनुसार, तक्रारदार प्रमोद पांडेय हे गेल्या २० वर्षांपासून मनोज तिवारी यांचे मॅनेजर म्हणून कार्यरत आहेत. त्यांनी पोलिसांना सांगितलं की, बेडरुममध्ये ठेवलेली एकूण ५.४० लाख रुपयांची रोकड चोरीला गेली होती. यापैकी जून २०२५ मध्ये कपाटात ठेवलेले ४.४० लाख रुपये आधीच गायब झाले होते, मात्र त्यावेळी चोरट्याचा सुगावा लागला नव्हता.
बनावट चाव्यांचा वापर
चोरीचा छडा लावण्यासाठी डिसेंबर २०२५ मध्ये घराच्या आतमध्ये सीसीटीव्ही कॅमेरे बसवण्यात आले होते. १५ जानेवारी २०२६ रोजी रात्री ९ वाजेच्या सुमारास सीसीटीव्ही अलर्टद्वारे माजी कर्मचारी सुरेंद्रकुमार शर्मा हा चोरी करताना दिसून आला. सीसीटीव्ही फुटेजमधून असं स्पष्ट झालं की, आरोपीकडे घराच्या मुख्य दरवाजाच्या, बेडरुमच्या आणि कपाटाच्या बनावटी चाव्या होत्या. त्यांच्या मदतीने तो अगदी सहज घरात प्रवेश करत असे.
गुन्ह्याची कबुली आणि अटक
पोलिसांनी दिलेल्या माहितीनुसार, आरोपीने त्याच रात्री (१५ जानेवारी) सुमारे एक लाख रुपयांची चोरी केली होती. सीसीटीव्ही फुटेजच्या आधारे पोलिसांनी त्याची चौकशी केली असता त्याने आपला गुन्हा मान्य केला. त्यानंतर आंबोली पोलिसांनी त्याला अटक केली. पोलिसांनी घटनेचे सीसीटीव्ही फुटेज जप्त केले असून संबंधित कलमान्वये गुन्हा दाखल करून पुढील तपास सुरू केला आहे.