आणखी एक सोनम! लग्नाच्या ८ महिन्यातच मांडला मृत्यूचा खेळ; पत्नीने प्रियकराच्या मदतीने काढला पतीचा काटा

आपल्या प्रेमसंबंधात अडसर ठरणाऱ्या पतीची पत्नीने प्रियकर आणि त्याच्या एका साथीदाराच्या मदतीने अत्यंत निर्घृणपणे हत्या केली.

प्रेम आंधळं असतं असं म्हणतात, पण हेच प्रेम जेव्हा क्रूरतेची सीमा ओलांडतं, तेव्हा माणुसकीला काळिमा फासणाऱ्या घटना घडतात. उत्तर प्रदेशातील सीतापूर जिल्ह्यात अशीच एक धक्कादायक घटना उघडकीस आली आहे. आपल्या प्रेमसंबंधात अडसर ठरणाऱ्या पतीची पत्नीने प्रियकर आणि त्याच्या एका साथीदाराच्या मदतीने अत्यंत निर्घृणपणे हत्या केली. डोक्यात लोखंडाच्या रॉडने वार करून आणि मफलरने गळा आवळून हा खून करण्यात आला आहे.

नेमकी घटना काय?

मयत राजू हा मूळचा लखनऊचा रहिवासी होता. ८ महिन्यांपूर्वीच त्याचा विवाह पप्पी देवी हिच्यासोबत झाला होता. १४ जानेवारीला मकर संक्रांतीनिमित्त राजू आपल्या सासरी म्हणजे बलदेव नगर येथे संक्रांत खिचडी खाण्यासाठी गेला होता. सण साजरा करून १५ जानेवारीला तो जेव्हा घरी परतण्यासाठी निघाला, तेव्हा वाटेतच काळ टपून बसला होता.

सापळा रचून हत्या

पत्नी पप्पी देवीने आपला प्रियकर डॉक्टर मोहम्मद तफजील उर्फ मीनू आणि त्याचा मित्र आनंद कुमार यांच्यासोबत मिळून पतीच्या हत्येचा कट आधीच रचला होता. नॅशनल हायवे-३० वरील खैराबाद टोल प्लाझाजवळ कमलापूर भागात या तिघांनी राजूला गाठले. पप्पी देवी तिथे स्वतः हजर होती. प्रियकर तफजील आणि आनंदने लोखंडी रॉडने राजूच्या डोक्यावर सपासप वार केले. रक्ताच्या थारोळ्यात पडलेल्या राजूचा जीव जात नाही हे पाहून त्यांनी मफलरने त्याचा गळा आवळला.

पुरावा नष्ट करण्याचा प्रयत्न

ही हत्या नसून अपघात वाटावा, यासाठी आरोपींनी राजूचा मृतदेह रस्त्याशेजारील झाडीत फेकून दिला आणि तिथून पळ काढला. बराच वेळ होऊनही राजू घरी न पोहोचल्याने कुटुंबीयांनी शोध सुरू केला. दरम्यान, झाडीत मृतदेह आढळल्याची बातमी वाऱ्यासारखी पसरली. नातेवाईकांनी घटनास्थळी धाव घेत मृतदेहाची ओळख पटवली आणि पोलिसांत तक्रार दाखल केली.

अनैतिक संबंधातून पतीचा बळी

पोलिसांनी तांत्रिक तपासाची चक्रे फिरवली तेव्हा पप्पी देवीचे कारस्थान उघड झाले. लग्नानंतरही पप्पीचे तिच्या माहेरच्या शेजारी राहणाऱ्या तफजीलसोबत प्रेमसंबंध सुरू होते. या प्रेमात पती अडथळा ठरत असल्याने तिने त्याला कायमचे संपवण्याचा निर्णय घेतला. पोलिसांनी तत्परता दाखवत पप्पी देवी, प्रियकर तफजील आणि त्याचा साथीदार आनंद अशा तिघांनाही अटक केली आहे. त्यांच्याकडून हत्येसाठी वापरलेला रॉड आणि मफलर जप्त करण्यात आला आहे.