जुन्या वादातून २१ वर्षीय तरुणाची हत्या; पोलिसांकडून ५ आरोपींना काही तासातच बेड्या

Murder Case : अंबरनाथ पूर्वेच्या शिवमंदिर परिसरातील शाळेजवळ ही घटना घडली.

ठळक मुद्देभाविक शिंदे असे या तरुणाचे नाव आहे. याप्रकारणी पोलिसांनी अवघ्या काही तासातच ५ आरोपींना बेड्या ठोकल्या आहे.

अंबरनाथ : एका २१ वर्षीय तरुणाची धारदार शस्त्राने हत्या करण्यात आल्याची घटना अंबरनाथमध्ये घडली आहे. भाविक शिंदे असे या तरुणाचे नाव आहे. याप्रकारणी पोलिसांनी अवघ्या काही तासातच ५ आरोपींना बेड्या ठोकल्या आहे. मंगळवारी रात्री हा प्रकार घडला आहे. अंबरनाथ पूर्वेच्या शिवमंदिर परिसरातील शाळेजवळ ही घटना घडली.

उल्हासनगरच्या कॅम्प ४ भागात राहणारा भाविक शिंदे हा तरुण काही मित्रांसोबत त्याठिकाणी बसलेला असताना तिथे आलेल्या काही जणांनी जुन्या भांडणांचा राग मनात धरून भाविक याला मारहाण केली आणि धारदार शस्त्राने वार करत त्याची हत्या केली. या घटनेनंतर शिवाजीनगर पोलिसांनी घटनास्थळी धाव घेत भाविक याचा मृतदेह उल्हासनगरच्या मध्यवर्ती रुग्णालयात शवविच्छेदनासाठी पाठवला. यानंतर हत्येच्या तपासादरम्यान अवघ्या काही तासातच पोलिसांनी चार आरोपींना बेड्या ठोकल्या. तर या प्रकरणातील मुख्य आरोपीला पोलिसांनी आज दुपारच्या सुमारास अटक केली. यापैकी चौघांना न्यायालयात हजर केले असता त्यांना ७ दिवसांची पोलीस कोठडी सुनावण्यात आली आहे. या प्रकरणात आणखी कुणाचा सहभाग होता का? तसंच भाविकांची हत्या नक्की जुन्या भांडणांच्याच वादातून झाली का? याचा तपास आता शिवाजीनगर पोलीस करत आहे.