ज्योत्स्ना वाघमारे यांना पुरस्कार
औरंगाबाद : इंदिरानगर, बायजीपुरा येथील केंद्रीय प्राथमिक व माध्यमिक शाळेच्या वतीने क्रांतिज्योती सावित्रीबाई फुले आणि राजमाता जिजाऊ यांच्या जयंतीनिमित्त मंगळवारी ‘लेकी सावित्रीच्या आणि जिजाऊच्या’ या कार्यक्रमात शैक्षणिक, प्रशासकीय, आरोग्य व सामाजिक क्षेत्रांत देदीप्यमान कामगिरी करणाऱ्या महिलांचा सन्मान सोहळा आयोजित करण्यात आला होता. यामध्ये ज्योत्स्ना ज्ञानदेव वाघमारे यांना ‘लेकी सावित्रीच्या अन् जिजाऊ’च्या या पुरस्काराने सन्मानित करण्यात आले.
रस्त्यासाठी उपोषणाचा ईशारा
औरंगाबाद : भीमनगर येथील सांची प्रवेशद्वार ते नंदनवन कॉलनीतील माउली मेडिकल चौकापर्यंतच्या रस्त्याची अतिशय दयनीय अवस्था झाली आहे. या संदर्भात महापालिकेला अनेकदा निवेदने देण्यात आली; पण महापालिकेच्या प्रशासनाने त्याकडे दुर्लक्ष केले आहे. या रस्त्याच्या दुरुस्तीचे काम १५ दिवसांच्या आत झाले नाही, तर महापालिकेच्या मुख्यालयासमोर उपोषण करण्याचा इशारा रिपाइंचे शहर उपाध्यक्ष संतोष जाधव यांनी दिला.