देगलुरात अतिक्रमणावर ‘जेसीबी’चा उतारा

देगलूर : राजकीय पाठबळाच्या आधारावर देगलुरातील रस्त्यांवर अतिक्रमण करणारे विविध भागातील शेकडो व्यावसायिक शेड उद्धवस्त करीत पालिका प्रशासनाने स्वच्छता मोहीम हाती घेतली़ मोठ्या पोलिस बंदोबस्तात १७ डिसेंबर रोजी पहाटे सुमारास या कारवाईस सुरुवात करण्यात आली़ मुख्याधिकारी रामदास पाटील, उपविभागीय पोलिस अधिकारी प्रशांत स्वामी, प्रशिक्षणार्थी पोलिस उपअधीक्षक सचिन बारी, पोलिस निरीक्षक शरद उगले हे या कारवाईदरम्यान उपस्थित होते़ अतिक्रमणाबरोबरच अनेक वर्षांपासून भाडेतत्वावर देण्यात आलेल्या जागा देखील मोकळ्या करण्यात आल्या़ भाडेतत्वावरील जागांचे नूतनीकरण न करणे, त्या अन्य व्यावसायिकास जबर भाड्याने देणे, अथवा अशा जागा हस्तांतरीत करून त्या सौद्यातून लाखो रुपयांची कमाई करणे असे अनेक गैरप्रकार समोर आल्याने भाडेतत्वावरील सर्व जागा मोकळ्या करण्यात आल्याचे मुख्याधिकारी रामदास पाटील यांनी सांगितले़ पोलिस ठाण्याच्या संरक्षक भिंतीलगत फुटपाथवर उभारलेल्या पब्लिक नोटरी कार्यालयास प्रथम लक्ष्य करण्यात आल्यानंतर सहाय्यक जिल्हाधिकारी कार्यालय, टपाल कार्यालय परिसराकडे मोर्चा वळवण्यात आला़ या ठिकाणी प्रारंभी विरोध करीत दगडफेक करण्यात आल्याने तणावाची स्थिती निर्माण झाली होती़ परंतु काही काळातच हा भाग अतिक्रमणापासून मुक्त करण्यात आला़ त्यानंतर दिवसभरात लोहीया मैदान, भाजी मंडई, गळगल्ली, जुना सराफा, जिल्हा परिषद (मुलांची) प्रशाळा, पिरोजदीन टॉकीज परिसर, नगर परिषद प्रशाळा परिसर, जिल्हा परिषद शहाजीनगर प्रशाळेचे प्रांगण, जुने बसस्थानक या ठिकाणी बेकायदेशीरपणे उभारलेले गाळे, टपऱ्या काढून रस्त्यांना पूर्व परिस्थितीवर आणले़ दरम्यान, उद्या दि.१९ डिसेंबर रोजीही अतिक्रमण विरोधात मोहिम राबविण्यात येणार आहे, असे सांगण्यात आले. (वार्ताहर)