‘क्रीम पोस्ट’साठी शिक्षकांची धावाधाव

बीड: नियमबाह्य पदोन्नत्याआधारे गटशिक्षणाधिकारी कार्यालयातील गटसमन्वयक या ‘क्रीम पोस्ट’ मिळविणाऱ्या शिक्षकांना मूळ ठिकाणी रुजू होण्याचे आदेश सीईओंनी दिले होते. मात्र, शिक्षक होण्याऐवजी ‘साहेब’ म्हणून मिरवण्यासाठी अनेकांनी प्रतिष्ठा पणाला लावली आहे.सर्व शिक्षा अभियानांतर्गत सर्व गटशिक्षणाधिकारी कार्यालयात गटसमन्वयक पदे आहेत. या पदांचा कार्यभार विस्तार अधिकाऱ्यांकडे द्यावा, असे आदेश राज्य प्राथमिक शिक्षण परिषदेच्या सहसंचालकांनी ५ एप्रिल २०१३ रोजी दिले होते. बीडमध्ये मात्र, या आदेशाला फाटा देत शिक्षकांनी प्रतिनियुक्त्यांवर तर काहींनी नियमबाह्य पदोन्नत्या घेत हा कार्यभार मिळविला होता. नियमबाह्य पदोन्नत्या रद्दचे आदेश तत्कालीन सीईओ राजीव जवळेकर यांनी दिले होते. मात्र, या आदेशाला शिक्षकांनी न्यायालयात आव्हान दिले होते. त्यानंतर प्रकरण अप्पर आयुक्तांकडे गेले. त्यांनी शिक्षकांच्या विरोधात निकाल दिला. २००९ च्या आरटीई अ‍ॅक्टनुसार जनगणना, निवडणूक व आपत्ती वगळता इतर कोणतेही अशैक्षणिक काम देता येत नाहीत. सीईओ नामदेव ननावरे यांनी मूळ ठिकाणी रुजू होण्याचे आदेशही काढले;परंतु अनेकजण आहे त्या पदालाच चिकटून राहण्यासाठी राजकीय दबाव आणू पाहत आहेत. (प्रतिनिधी)