रस्त्याच्या बाजूची वाहने ठरताहेत वाहनकोंडीला कारणीभूत

अंबाजोगाई : अरूंद रस्ते व त्या रस्त्यावर उभी असणारी दुचाकी व चारचाकी वाहने वाहतुकीची मोठी कोंडी करतात. याचा मोठा त्रास विद्यार्थी, बालकांसह महिला व ज्येष्ठ नागरिकांना सहन करावा लागतो. अक्षरश: तारेवरची कसरत करत मार्गक्रमण करण्याची वेळ अंबाजोगाईकरांवर येते. घरातून निघाल्यावर परत जाईपर्यंत जीव मेटाकुटीला येतो. अंबाजोगाई शहारातील बसस्थानक ते शिवाजी चौक, सावरकरचौक ते सायगाव नाका या मुख्य रस्त्यावर शाळा, कोचिंग क्लासेस, विविध रुग्णालये, संगणक शाळा, व्यापार पेठ, विविध कार्यालये, नागरी बँका व आर्थिक संस्था याच मुख्य रस्त्यावर आहेत. त्यामुळे या रस्त्यावर मोठी गर्दी असते. या परिसरात असणाऱ्या रुग्णालयांसमोर रिक्षा, चारचाकी वाहने, दुचाकी वाहने, रस्त्याच्या दोन्ही बाजूला सर्रास लावलेली असतात. परिणामी रस्त्याने चालणाऱ्या ज्येष्ठ नागरिक व महिलांना तारेवरची कसरत करत हा रस्ता पार करावा लागतो. या परिसरात मोठमोठी खाजगी रुग्णालये आहेत. मात्र, कोणत्याही रुग्णालयाकडे स्वत:ची पार्किंगची व्यवस्था नाही. रुग्णालयात येणाऱ्या सर्वांचीच वाहने सर्रास रस्त्यावरच लावली जातात. यामुळे वाहतुकीचा प्रश्न या परिसरात दिवसेंदिवस वाढत आहे. रस्त्याने जाणारी वाहने एकाच मार्गाने ये-जा करीत असल्याने व एखादे मोठे वाहन जर या रस्त्यावर आले तर अर्धातास वाहतुक यंत्रणा ठप्प राहते. हे चक्र गेल्या अनेक वर्षांपासून सातत्याने सुरूच आहे. नगर परिषद व पोलिस प्रशासनाने या परिसरातील वाहतुकीची कोंडी रोखण्यासाठी टाकलेला आडवा बांबूही काढून टाकण्यात येतो. अशीच अवस्था शहरातील सर्वच मुख्य रस्त्यांची झाली आहे. यशवंतराव चव्हाण चौक ते शिवाजी चौक, मेडीकल कॉलेज ते भगवानबाबा चौक, तसेच योगेश्वरी मंदिर रस्ता, या सर्वच मुख्य रस्त्यांवर अवैध वाहतूक करणारी वाहने सर्रास उभी असतात. अरूंद रस्ते व उभी असलेली वाहने याचा मोठा फटका शहरवासियांना बसतो. परिणामी लहान-मोठे अपघात सातत्याने घडत असतात. अंबाजोगाई बसस्थाकासमोरही रस्त्यावर दुचाकी गाडया, हातगाडया लावण्यात येत असल्यामुळे परिसरातही वाहतुकीची मोठी कोंडी होत आहे. बसस्थानक परिसरात पार्किंगची व्यवस्था करण्यात आली आहे. मात्र, तेथे प्रति वाहन पाच रुपये अशी दरआकारणी होत असल्याने फुकटात वाहने रस्त्यावर लावण्याची सवयच वाहनधारकांना लागल्याने दिवसेंदिवस ही समस्या गंभीर स्वरूप धारण करत आहे. ही कोंडी दूर करण्यासाठी वाहनांच्या पार्किंगची व्यवस्था नगर परिषदेने करावी अशी मागणी राष्ट्रवादी मागासवर्गीय सेलचे जिल्हा उपाध्यक्ष दीपक कांबळे यांनी केली. (वार्ताहर)