'ज्या हॉटेलमध्ये थांबलेलो, तिथेच मिसाईल पडले'; राजेंद्र दर्डा यांची दुबईतील युद्धाच्या छायेतून थोडक्यात सुटका

Iran attack on Dubai Marina : लोकमतचे एडिटर-इन-चीफ राजेंद्र दर्डा यांची दुबईतील इराण-इस्रायल युद्धाच्या छायेतून थोडक्यात सुटका झाली आहे.

- राजेंद्र दर्डा, एडिटर- इन- चीफ
लोकमत न्यूज नेटवर्क

छत्रपती संभाजीनगर : अमेरिका-इस्रायल-इराण युद्धाच्या अगदी २४ तास आधी मी दुबईत होतो. मरिना भागात मी राहिलो. बुर्जखलिफाच्या सावलीत फिरलो. अजित मुथियान व प्रकाश गंगवाल हे मित्रही सोबत होते. ज्या भागात राहिलो, फिरलो त्याच परिसरात इराणने आपले क्षेपणास्त्र डागले,  असे लोकमतचे एडिटर- इन- चीफ  राजेंद्र दर्डा यांनी सांगितले. 

इंदूरचा पारिवारिक कार्यक्रम नसता, तर आम्ही दोन दिवस अधिक थांबणार होतो. तसे झाले असते तर तिथेच अडकलो असतो. २८  फेब्रुवारी रोजी म्हणजे ज्या दिवशी हे युद्ध सुरू झाले, त्याच दिवशी इंदूर येथे पारिवारिक कार्यक्रम नियोजित होता. त्यामुळे मी व माझे मित्र एक दिवस अगोदर दुबईहून परतलो.  परतल्यानंतर काल शनिवारी मी टीव्हीवर पाहत होतो, मरिना (दुबई) परिसरात इराणने आपले मिसाईल डागले. त्याच ठिकाणी मी मुक्कामी होतो. बुर्जखलिफा या ठिकाणीही इराणने ड्रोन डागले, त्या ठिकाणीदेखील आम्ही भेट दिली होती. शनिवारी टीव्हीवर मी दुबाईतील दृश्य पाहिले, हृदय धडधडले, अंगावर शहारे आले.  कदाचित इंदूरला  कार्यक्रम नसता, तर आम्ही युद्धाच्या सावलीत दुबईतच अडकलो असतो हे निश्चित, असे राजेंद्र दर्डा म्हणाले.