पाटील, मोटे आज उमेदवारी दाखल करणार

उस्मानाबाद : राष्ट्रवादी काँग्रेस पक्षाचे राणाजगजितसिंह पाटील व राहुल मोटे हे २५ सप्टेंबर रोजी तर काँग्रेसचे मधुकरराव चव्हाण हे शुक्रवारी उमेदवारी अर्ज दाखल करणार आहेत. दोन्ही पक्षाकडून मोठे शक्तीप्रदर्शन होण्याची शक्यता आहे.
उस्मानाबाद-कळंब विधानसभा मतदार संघातून राकँतर्फे माजी राज्यमंत्री राणाजगजितसिंह पाटील हे गुरूवारी उमेदवारी अर्ज दाखल करणार आहेत. धारासूर मर्दिनी, ख्वॉजा शमशोद्दीन गाझी रहे. दर्गाह येथे दर्शन घेवून लोकशाहीर आण्णा भाऊ साठे, डॉ. बाबासाहेब आंबेडकर, छत्रपती शिवाजी महाराज यांना अभिवादन करून मिरवणूक न काढता साध्या पद्धतीने नामनिर्देशनपत्र दाखल करण्यात येईल, असे राकाँ जिल्हाध्यक्ष सुरेश बिराजदार यांनी कळविले आहे. तसचे भूम-परंडा-वाशी या मतदार संघातून राकाँच्या वतीने विद्यमान आ. राहुल मोटेही गुरूवारीच उमेदवारी दाखल करणार आहेत. नामनिर्देशनपत्र दाखल केल्यानंतर गौलाई चौकातून पदयात्रा काढण्यात येणार आहे. ही पदयात्रा ओंकार चौक, नगर परिषद चौक, वेताळ रोड मार्गे आण्णा भाऊ साठे गोलाई चौकातून साहील दूधसंकलन केंद्र येथे दाखल होईल. त्यानंतर या ठिकाणी जाहीर सभा होणार आहे.
दरम्यान, तुळजापूर विधानसभा मतदार संघातून काँग्रेसचे पालकमंत्री मधुकरराव चव्हाण हे शुक्रवारी श्री तुळजाभवानी मातेच्या दर्शनानंतर सकाळी दहा वाजता छत्रपती शिवाजी महाराज, डॉ. बाबासाहेब आंबेडकर यांच्या पुतळ्यास पुष्पहार अर्पण करून अमित देशमुख, बसवराज पाटील यांच्यासह वरिष्ठ नेतेमंडळीच्या उपस्थितीत उमेदवारी अर्ज दाखल करतील. त्यानंतर हडको मैदानावर जाहीर सभा घेण्यात येणार असल्याचे काँग्रेस पक्षाचे जिल्हाध्यक्ष आप्पासाहेब पाटील व माजी जिल्हाध्यक्ष विश्वास शिंदे यांनी कळविले आहेत. (प्रतिनिधी)