ऊस वाहतूक करणाऱ्या ट्रॅक्टर ट्रॉलीला कार धडकून एक जण ठार; एक गंभीर

गंगापूर- वैजापूर मार्गावर मांजरी पाटीजवळ झाला अपघात

गंगापूर : ऊस वाहतूक करणाऱ्या दोन ट्रॉलींच्या ट्रॅक्टरवर पाठीमागून धडकलेल्या कारमधील एका जणाचा उपचारादरम्यान मृत्यू झाला, तर एक जण गंभीर जखमी झाला. गंगापूर- वैजापूर मार्गावर मांजरी पाटीजवळ गुरुवारी रात्री ०८:०० वाजेच्या सुमारास ही घटना घडली. नितीन रामा मारनर (वय ३३, रा. कळंभीर, ता. साक्री, जि. धुळे), असे कारमधील मृताचे नाव आहे.

गंगापूरकडून वैजापूरकडे ऊस घेऊन जाणाऱ्या दोन ट्रॉलींच्या ट्रॅक्टरला (एमएच १९ पी ४४१२) पाठीमागून येणाऱ्या कारने (एमएच २० बीएन ४५४५) जोरदार धडक दिली. या धडकेत कारमधील नितीन रामा मारनर (३३) आणि पंकज आत्माराम बोरसे (४०, दोघेही रा. कळंभीर, ता. साक्री, जि. धुळे) गंभीर जखमी झाले. अपघाताची माहिती मिळताच रुग्णवाहिका चालक सागर शेजवळ यांनी घटनास्थळी धाव घेत जखमींना गंगापूर उपजिल्हा रुग्णालयात दाखल केले. प्राथमिक उपचारांनंतर त्यांना छत्रपती संभाजीनगर येथे हलविण्यात आले असता तेथील डॉक्टरांनी नितीन मारनर यांना तपासून मृत घोषित केले. पंकज बोरसे यांच्यावर उपचार सुरू आहेत.