नवा फलक, नवा अभिमान! छत्रपती संभाजीनगर विमानतळावर आपले स्वागत आहे!

छत्रपती संभाजीनगर विमानतळावर नव्या ओळखीचे स्वागत! नामकरणानंतर आता स्वागताचा फलकही झळकला

छत्रपती संभाजीनगर: पर्यटन राजधानी म्हणून जगभर ओळखल्या जाणाऱ्या या शहरात येणाऱ्या प्रत्येक विमान प्रवाशाचे स्वागत आता एका नव्या आणि अभिमानास्पद ओळखीने होत आहे. काही दिवसांपूर्वीच विमानतळाचे अधिकृत नामकरण ‘छत्रपती संभाजीनगरविमानतळ’ असे करण्यात आले होते. या ऐतिहासिक निर्णयाची अंमलबजावणी आता प्रत्यक्ष जमिनीवर दिसू लागली असून, विमानतळावर ‘छत्रपती संभाजीनगर विमानतळावर आपले स्वागत आहे,’ असा नवा कोरा स्वागत फलक दिमाखात लावण्यात आला आहे.

केवळ नावाचा बदल कागदोपत्री न राहता, आता विमानतळाच्या प्रवेशद्वारापासून ते आतमध्ये ठिकठिकाणी नवीन फलक लावण्याचे काम युद्धपातळीवर सुरू आहे. विमानतळावर नव्या नावाचा हा फलक झळकल्याने शहराची नवी ओळख अधिक दृढ आणि स्पष्ट झाली आहे.

विमानतळावर बदलले चित्र
यापूर्वी हा विमानतळ ‘औरंगाबाद’ या नावाने ओळखला जात होता. मात्र, आता विमानतळ परिसरात ठिकठिकाणी ‘छत्रपती संभाजीनगर’ हे नाव अधिकृतपणे झळकू लागल्याने स्थानिक नागरिकांमध्ये आनंदाचे वातावरण आहे. शहरात येणाऱ्या देशी-विदेशी पर्यटकांना आता विमानतळावर पाऊल ठेवल्यापासूनच शहराच्या नव्या इतिहासाची आणि अस्मितेची जाणीव होणार आहे.