भूममध्येही राष्ट्रवादीच

भूम : तुळजापूर बाजार समितीच्या निवडणुकीनंतर भूम कृषी उत्पन्न बाजार समितीच्या निवडणुकीतही राष्ट्रवादी काँग्रेस पुरस्कृत बाणगंगा शेतकरी विकास पॅनलने १७ पैकी १५ जागावर निर्विवाद विजय मिळविला. शिवसेना-भाजपा-काँग्रेस या पक्षांनी एकत्रित येवून स्थापन केलेल्या अलमप्रभू शेतकरी विकास पॅनलला केवळ दोन जागांवर समाधान मानावे लागले. बाजार समितीच्या १७ जागांसाठी रविवारी मतदान पार पडल्यानंतर सोमवारी येथील जि. प. शाळेत पाच टेबलवर मतमोजणी करण्यात आली. प्रारंभी व्यापारी मतदार संघाची मोजणी झाली. यामध्ये एकूण दोन जागासाठी ५ उमेदवार रिंगणात होते. यामध्ये सर्वपक्षीय पॅनलमधून काँग्रेस (आय) चे रोहन राजाराम जाधव हे विजयी झाले. तर दुसऱ्या जागेसाठी राष्ट्रवादी काँग्रेसचे नाईकवाडी समाधान ईश्वर यांना २३ मते पडली. त्यांच्या विरोधात असलेले भाजपाचे लवटे वसंत सोनाजी यांनाही २३ मते पडली. दोघांनाही समसमान मते मिळाल्याने चिठ्या टाकून भाजपच्या वसंत सोनाजी लवटे यांना विजयी घोषित करण्यात आले. यानंतर ग्रामपंचायत मतदारसंघ, सोसायटी मतदारसंघात राष्ट्रवादी काँग्रेसने चांगली मते घेऊन सेना, भाजपा, काँग्रेसचा धुव्वा उडविला. कृषी उत्पन्न बाजार समिती निवडणुकीसाठी सेना भाजपा, काँग्रेस आय यांनी केलेली आघाडी व्यापारी मतदारसंघ वगळता सपशेल फेल ठरली. यामुळे सेना, भाजपा व काँग्रेस यांना आघाडी करूनही मतदारांनी नाकारले. १२ वाजेपर्यंत सर्वच जागांचे निकाल जाहीर झाले. यानंतर राष्ट्रवादीच्या पदाधिकारी, कार्यकर्त्यांनी जोरदार आतषबाजी व गुलालाची उधळण करून जल्लोष केला. येथील शिवाजी खरेदी विक्री संघातही मोठ्या संख्येने राष्ट्रवादीचे कार्यकर्ते उपस्थित होते. राष्ट्रवादी काँग्रेसकडून नवीन चेहऱ्यांना संधी दिली होती. यामुळे मतदारांनी तरुण उमेदवारांना भरघोस मतदान केले असून, कृषी उत्पन्न बाजार समिती सक्षम करण्यासाठी काम करावे, अशा अपेक्षा व्यक्त होत आहेत. या प्रक्रियेसाठी निवडणूक निर्णय अधिकारी म्हणून ए. टी. सय्यद यांनी काम पाहिले. (वार्ताहर)राष्ट्रवादी पुरस्कृत पॅनलचे संजय वसंतराव पाटील (३११), कैलास भीमा जाधव (३२१), नामदेव मारुती नागरगोजे (३४९), मिनाक्षी शिवाजी डोके (३६२), सुधा वसंत यादव (३५२), दिलीप बलभीम माळी (३६९), बलभीम चंदभान भसाड (३४३), सुरेश भागवत भोरे (३३७), विलास नरहरी चव्हाण (३१६), अशोक शेषराव गायकवाड (३२३), जयसिंग मनोहर गोफणे (३३२), रमेश विश्वंभर मस्कर (३३४), धोंडीअण्णा त्र्यंबक पवार (३२९), भगवान महादेव ढगे (२८८), युवराज दगडप्पा तांबे (२८१) विजयी ठरले तर सर्वपक्षीय अंलमप्रभू शेतकरी विकास पॅनलचे रोहन राजाराम जाधव (३३), वसंत सोनाजी लवटे (२३) विजयी झाले.