सराफा व्यापारी अन् पोलिसांत जुंपली

लातूर : कर्नाटक राज्यातील गुलबर्गा येथून आलेल्या पोलिसांनी लातूरच्या सराफाबाजारातील एका व्यापाऱ्यास मारहाण करून गाडीत बसविल्याचा निषेध करून सराफा व्यापाऱ्यांनी बंद पुकारला़ अचानक दुकाने बंद करून सराफा व्यापाऱ्यांनी गांधी चौक पोलिस ठाण्यात मोर्चा काढला़ गर्दी जास्त वाढल्याने गांधी चौक पोलिसांनी जमाव पांगविण्यासाठी किरकोळ लाठीमार केल्याची घटना मंगळवारी सायंकाळी घडली़ पोलिसांनी लाठीमाराचा इन्कार करुन फक्त जमाव पांगविल्याचे सांगितले़गुलबर्गा पोलिसांत सोने चोरी प्रकरणी गुन्हा दाखल आहे़ या चोरीप्रकरणात लातूरचे खंडू कांबळे व सुनिल गडगेवार हे दोन आरोपी आहेत़ पोलिसांनी अधिक चौकशी केल्यावर त्यांनी लातूरच्या दुकानात सोने विकल्याची कबुली दिली़ त्यानंतर गुलबर्गा पोलिस ठाण्याचे पोलिस निरीक्षक संजीवकुमार आरोपींना घेऊन लातुरात आले होते़ आरोपींनी सोने विक्री केलेली दुकाने दाखविल्यावर पोलिसांनी एका व्यापाऱ्यास मारहाण करून गाडीत बसविल्यानंतर सराफा व्यापारी संतप्त झाले़ त्याचबरोबर अन्य दोन व्यापाऱ्यांनाही चौकशीसाठी ताब्यात घेऊन कर्नाटक पोलिस गांधी चौकात आले़ सराफा व्यापाऱ्यांनी दुकाने बंद करून पोलिसांचा निषेध करीत पोलिस ठाणे गाठले़ दरम्यान, आमदार अमित देशमुख यांनी पोलीस ठाण्यात येऊन व्यापारी व पोलिसांशी चर्चा केली़ यावेळी अपर पोलीस अधीक्षक लता फड, पोलिस निरीक्षक गजानन भातलवंडे, स्थानिक गुन्हा शाखेचे पोलीस निरीक्षक बालाजी सोनटक्के, व्यापारी महासंघाचे अध्यक्ष प्रदीप सोळंकी, सराफा व्यापारी असोसिएशनचे अध्यक्ष विश्वनाथ किनीकर आदींची उपस्थिती होती़ चर्चेनंतर ताब्यात घेण्यात आलेल्या तिन्ही व्यापाऱ्यांना पोलिसांनी चौकशी करून सोडून दिले, त्यानंतर प्रकरण निवळले़ (प्रतिनिधी)पोलीस आणि सराफा व्यापाऱ्यांचा वाद चिघळला होता़ व्यापाऱ्यांनी आपली दुकाने बंद करून पोलिस ठाण्याकडे मोर्चा वळविला़ व्यापाऱ्यांना नाहक त्रास होऊ नये, यासाठी व्यापारी महासंघाचे अध्यक्ष प्रदीप सोळंकी व सराफा असोशिएशनचे अध्यक्ष विश्वनाथ किनीकर यांनी आमदार अमित देशमुख यांना ही माहिती दिली़ त्यांनी थेट गांधी चौक पोलीस ठाणे गाठले़ एखाद्या प्रश्नासाठी आमदार अमित देशमुख पहिल्यांदाच पोलीस ठाण्यात गेल्याचे पहायला मिळाले़ त्यांनी पोलीस अधिकाऱ्यांशी चर्चा करुन वाद मिटविला़ लातूरच्या राजकारणात राजकीय नेते क्वचित वेळाच पोलीस ठाण्यात जातात़ अनेक दिग्गज नेते पोलिस ठाण्यात गेल्याचे ऐकिवातही नाही़ परंतु प्रश्न व्यापाऱ्यांचा असल्याने अमित देशमुख यांनी ठाण्यात धाव घेतल्याने चर्चा रंगली होती़ त्यांच्या येण्याने व्यापारी मात्र खुश होते़