छत्रपती संभाजीनगर : गंगापूर विधानसभा मतदार संघातून इच्छुक असलेले राष्ट्रवादी काँग्रेसचे (अप) निलंबित आ. सतीश चव्हाण यांना राष्ट्रवादी काँग्रेस शरदचंद्र पवार या पक्षाचा एबी फॉर्म शुक्रवारी मिळाल्याची चर्चा आहे. मागील काही दिवसांपासून आ. चव्हाण तुतारी हाती घेणार असल्याची चर्चा सुरू होती. परंतु गंगापूर विधानसभा मतदारसंघ महविकास आघाडीमध्ये कोणत्या पक्षाकडे जाणार यावरून वरिष्ठ पातळीवर बैठकांवर बैठका सुरू होत्या.
शिवसेनेसह काँग्रेस पक्षानेही जागेवर दावा होता. पण हा मतदारसंघ शरद पवार गटाला सोडवून घेण्यात यश मिळाल्याचे सूत्रांनी सांगितले. दरम्यान, सोमवारी (दि.२८) आ.चव्हाण हे आ. राजेश टोपे यांच्या उपस्थितीत पक्षात प्रवेश करतील, व त्यानंतर उमेदवारी अर्ज दाखल करणार असल्याची माहिती सूत्रांनी दिली. भाजपचे आ. प्रशांत बंब विरुद्ध आ. चव्हाण असा सामना मतदारसंघात होणे शक्य आहे. पक्षप्रवेश आणि एबी फाॅर्म मिळाल्याच्या चर्चेप्रकरणी आ. चव्हाण यांच्याशी संपर्क करण्याचा प्रयत्न केला, परंतु ते उपलब्ध होऊ शकले नाहीत.