भाविकांनो लक्ष द्या! धुलिवंदनला घृष्णेश्वर दर्शन घ्यायचंय? चंद्रग्रहणात ४ तास गाभारा राहणार बंद

घृष्णेश्वर मंदिर दर्शन वेळेत बदल; ३ मार्चला चंद्रग्रहणामुळे ४ तास मंदिर राहणार बंद

वेरूळ (छत्रपती संभाजीनगर): येथील बारावे ज्योतिर्लिंग श्री घृष्णेश्वर मंदिर ३ मार्च २०२६ (मंगळवार) रोजी होणाऱ्या खग्रास चंद्रग्रहणाच्या पार्श्वभूमीवर भाविकांसाठी दुपारी ३ ते सायंकाळी ७ या वेळेत बंद राहणार आहे. धुलिवंदनच्या दिवशीच हे ग्रहण असल्याने आणि मंगळवारी वेरूळ लेणीही बंद असल्याने पर्यटकांची मोठी गैरसोय होण्याची शक्यता आहे.

धार्मिक परंपरेमुळे निर्णय
मंदिर प्रशासनाने दिलेल्या माहितीनुसार, ग्रहणाच्या काळात धार्मिक परंपरेनुसार मंदिराचे दरवाजे बंद ठेवले जातात. ३ मार्च रोजी दुपारी ३:२० ते सायंकाळी ६:४७ या वेळेत खग्रास चंद्रग्रहण असणार आहे. त्यामुळे दुपारी ३:०० वाजल्यापासूनच गाभाऱ्यातील प्रवेश आणि दर्शन थांबवण्यात येईल. ग्रहण संपल्यानंतर मंदिराची स्वच्छता आणि शुद्धीकरण पूजा केली जाईल. त्यानंतर सायंकाळी ७:०० वाजता मंदिर पुन्हा दर्शनासाठी खुले होईल.

भाविकांना नियोजनाचे आवाहन
मंदिर ट्रस्टचे अध्यक्ष कुणाल दांडगे यांनी भाविकांना वेळेचे योग्य नियोजन करण्याचे आवाहन केले आहे. विशेष म्हणजे ३ मार्च रोजी मंगळवार असल्याने वेरूळ लेणी दर आठवड्याप्रमाणे देखभाल व दुरुस्तीसाठी बंद राहणार आहे. त्यातच दुपारी मंदिरही बंद राहणार असल्याने बाहेरगावच्या पर्यटकांनी याची नोंद घ्यावी, असे देवस्थान प्रशासनाने स्पष्ट केले आहे.

महत्त्वाचे वेळापत्रक: 
मंदिर बंद राहण्याची वेळ: दुपारी ३:०० ते सायंकाळी ७:००
ग्रहणाचा काळ: दुपारी ३:२० ते सायंकाळी ६:४७
दर्शन पुन्हा सुरू: सायंकाळी ७:०० वाजता
विशेष टीप: मंगळवार असल्यामुळे वेरूळ लेणी पूर्ण दिवस बंद राहतील.