लॉकडाऊनमध्ये लाच घेणाऱ्या हवालदाराला ४ वर्षांचा कारावास; सत्र न्यायालयाचा मोठा निकाल

कोविड काळात तंबाखू व पान मसाला विक्रीस मदत आणि अटक न करण्यासाठी लाच घेतल्याचा गुन्हा

छत्रपती संभाजीनगर : कोविड लॉकडाऊनच्या काळात तंबाखू व पान मसाला विक्रीस मदत करण्यासाठी आणि अटक न करण्यासाठी १५ हजार रुपयांची लाच घेतल्याच्या आरोपाखाली तत्कालीन पोलिस हवालदार यमाजी लक्ष्मण खटाणे (रा. प्लॉट क्र. ७८, रेणुकानगर, गारखेडा परिसर) याला शुक्रवारी सत्र न्यायाधीश एस. के. कुलकर्णी यांनी ४ वर्षे सक्तमजुरी आणि ५० हजार रुपये दंड ठोठावला.

एका प्लंबरने दिलेल्या फिर्यादीनुसार, लॉकडाऊनमुळे कामधंदा बंद असल्याने तो एका व्यक्तीकडून तंबाखू व पान मसाल्याचे प्रत्येकी १० मोठे पुडे खरेदी करून शहरातील काही दुकानदारांना ते विकण्यासाठी दुचाकीवरून गेला. इंदिरानगर परिसरात विक्री करत असताना पुंजाबाई चौकाजवळ दोघांनी त्याला अडवले. तंबाखू विक्रीवर बंदी असताना विक्री करत असल्याचे सांगत त्याला शिवाजीनगर पोलिस चौकीत नेले. पोलिसांनी तंबाखू व पान मसाल्याचे पुडे व ४० ते ४२ हजार रुपयांची रक्कम जप्त केली. दोन वेगवेगळ्या कागदांवर सही व अंगठा घेतला.

हवालदार खटाणे याने या प्रकरणात मदत करण्यासाठी १५ हजार रुपयांची लाच मागितली. रक्कम न दिल्यास अटक करून हर्सुल कारागृहात पाठवण्याची धमकी दिली. त्यानंतर फोन करून १५ हजार रुपये घेऊन चौकीत येण्यास सांगितले. प्लंबरने लाचलुचपत प्रतिबंधक विभागाकडे तक्रार केली. एसीबीने सापळा रचून खटाणेला १५ हजार रुपयांची लाच घेताना रंगेहाथ पकडले. याबाबत जवाहरनगर पोलिस ठाण्यात गुन्हा दाखल करण्यात आला होता.

सुनावणी व आदेशएसीबीचे पोलिस निरीक्षक महादेव ढाकणे यांनी न्यायालयात दोषारोपपत्र दाखल केले. सहायक लोकअभियोक्ता अनिल हिवराळे यांनी साक्षीदारांचे जबाब नोंदवले. एसीबीचे निरीक्षक केशव डींडे व हवालदार बी. एच. थोरात यांनी पैरवीचे काम पाहिले.