‘जय श्रीराम’च्या जयघोषात मिरवणुका

हिंगोली : शहरातील विविध भागात रामनवमीमुळे सकाळपासून राममय वातावरण झाले होते. शहरातील विविध भागात रामनवमीनिमित्त धार्मिक कार्यक्रम घेण्यात येत होते. दिवसभर भजन, कीर्तन आदी कार्यक्रम सुरू असल्याचे दिसून आले. सायंकाळी राम नामाच्या जयघोषात मिरवणुका काढण्यात आल्या.शहरातील रिसाला, कपडा गल्ली, अकोला रोड, जिजामातानगर, नारायणनगर, नाईकनगर आदीसह शहरभर रामनवमीच्या कार्यक्रमांची रेलचेल पहायला मिळाली. त्याचबरोबर रक्तदान शिबीर व इतरही कार्यक्रम ठेवण्यात आले होते. ठिकठिकाणी रामभक्तांसाठी पाणी, फराळाचीही व्यवस्था करण्यात आली होती. रांगोळी काढून काही भागात मिरवणुकांचे स्वागत करण्यात आले. झांज पथक, लेझिम पथक व बॅण्ड पथकांनी दुपारनंतर शहर दणाणून सोडले होते. यात मुलांसह मुलींचीही पथके होती. त्याचबरोबर श्रीराम, हनुमान, राम, लक्ष्मणाच्या देखाव्यांसह त्या वेशभूषेतही अनेकजण दिसत होते. श्रीराम राज्य रामनवमी मंडळातर्फे रक्तदान शिबीर घेण्यात आले. यात ९७ जणांनी रक्तदान केले.स्वराज्य मित्रमंडळाने भव्य रॅली काढली होती. यात अध्यक्ष बंटी राठोड, उपाध्यक्ष रुद्रा केंद्रे, शशिकांत वडकुते, विजय गडदे, ओमपाटील, राजू कांबळे, समाधान बलखंडे, नितीन खिल्लारे आदी उपस्थिती होती. (जिल्हा प्रतिनिधी)सार्वजनिक रामनवमी महोत्सव समितीतर्फे किर्तन, श्रीरामजी की अयोध्या सेना मंडळाकडून श्रीरामाचा देखावा, गांधी चौकात रामराज्य मित्र मंडळातर्फे पाणी बचतीचे संदेश देणारे फलक बसविण्यात आले होते. तसेच महेश चौकात हिंदुगर्जना मित्रमंडळातर्फे महाआरती कार्यक्रम घेण्यात आला.