बेरोजगारांनो लक्ष द्या! छत्रपती संभाजीनगर मनपात २२२ पदांची भरती; अर्ज भरण्यास मुदतवाढ

१७ फेब्रुवारीपासून ऑनलाइन अर्ज स्वीकारण्यास सुरुवात झाली.

छत्रपती संभाजीनगर : महापालिकेत २२२ रिक्त पदांसाठी भरती प्रक्रिया सुरू केली. ऑनलाइन अर्ज भरण्यासाठी बुधवार, १८ मार्च रोजी अंतिम मुदत होती. अर्ज कमी प्रमाणात आल्याने ३१ मार्चपर्यत मुदतवाढ देण्यात आली आहे.

१६ फेब्रुवारी रोजी मनपाने जाहिरात प्रसिद्ध केली होती. १७ फेब्रुवारीपासून ऑनलाइन अर्ज स्वीकारण्यास सुरुवात झाली. मागील एक महिन्यात उमेदवारांकडून पाहिजे तसा प्रतिसाद मिळाला नाही. त्यामुळे मुदतवाढ देण्यात आली. या भरती प्रक्रियेत अग्निशमन विभागातील ११९ पदांचा समावेश आहे. यामध्ये उपअग्निशमन अधिकारी ४, अग्निशामक १०० आणि चालक - यंत्रचालक १५ पदांचा समावेश आहे. याशिवाय कनिष्ठ अभियंता (स्थापत्य) ३२, स्वच्छता निरीक्षक १२, रोखपाल १२, अनुरेखक ९, पशुधन पर्यवेक्षक ७, उद्यान सहायक ६, स्थापत्य अभियांत्रिकी सहायक व अतिक्रमण निरीक्षक २४ पदांसाठी ही भरती केली जाणार आहे.