शेतकऱ्यांचे धाडस!; बकऱ्यांसाठी दुसऱ्यांदा वाड्यात शिरताच बिबट्याला केलं बंदिस्त, मादी पसार

बकऱ्यांच्या शिकारीसाठी दुसऱ्यांदा आला अन् अडकला; ग्रामस्थांनी वाड्याची कडी लावून बिबट्याला केले जेरबंद

छत्रपती संभाजीनगर : अजिंठा वनपरिक्षेत्रातील अंधारी शिवारात शनिवारी रात्री बिबट्याच्या हल्ल्याने ग्रामस्थांमध्ये भीतीचे वातावरण निर्माण झाले होते. मात्र, ग्रामस्थांचे धाडस आणि वनविभागाच्या तत्पर कारवाईमुळे वाड्यात अडकलेल्या नर बिबट्याला रविवारी पहाटे सहाच्या सुमारास जेरबंद करण्यात पथकाला यश आले.

दोन दिवसाांपुर्वी वाड्यात शिरून चार बकऱ्यांचा फडशा पाडल्यानंतर दुसऱ्यांदा जाऊन बकऱ्यांवर ताव मारण्यासाठी बिबट्या आला होता. ही घटना १४ मार्च रोजी रात्री सुमारे ११:३० वाजता घडली. अंधारी गावातील शेतकरी युसूफ खान अय्युब खान यांच्या शेतातील वाड्यात नर-मादी बिबट्यांची जोडी शिरली. पण दोन दिवसांपुर्वी घडलेल्या घटनेनंतर शेतकरी युसूफ खान यांनी वाड्यातील बकऱ्या इतर ठिकाणी बांधल्या होत्या. अचानक झालेल्या या हल्ल्यामुळे परिसरात एकच खळबळ उडाली. दरम्यान, काही ग्रामस्थांनी धाडस दाखवत तत्काळ वाड्याच्या दरवाजाला कडी लावल्याने बिबट्याला आतच बंदिस्त झाला. यादरम्यान मादी बिबट्या बाहेर पडली. खबरदारी म्हणून ग्रामस्थांनी लगेच याबाबत वनविभागाला याबाबत माहिती कळवली.

या घटनेची माहिती मिळताच उपवनसंरक्षक सुवर्णा माने आणि सहायक वनसंरक्षक स्वप्नील भामरे यांनी वाड्यात अडकलेल्या बिबट पकडण्यासाठी पथकाला सूचना दिल्या. वनविभागाच्या पथकाने रात्रीच घटनास्थळी धाव घेतल्यानंतर रविवारी पहाटे सुमारे सहाच्या सुमारास वनपरिक्षेत्र अधिकारी संतोष दोडके यांच्या नेतृत्त्वाखालील पथकाने वाड्यात अडकलेल्या नर बिबट्याला सुरक्षितरीत्या जेरबंद केले. यासाठी पथकाने वाड्याच्या दरवाजासमोर मोठा पिंजरा लावला होता. या कारवाईमुळे परिसरातील ग्रामस्थांनी सुटकेचा निःश्वास सोडला.

दरम्यान, दोन दिवसांपूर्वीही याच ठिकाणी बिबट्याने बकऱ्यांवर हल्ला केल्याची माहिती ग्रामस्थांनी दिली. त्याच बिबट्यांच्या जोडीने पुन्हा त्या ठिकाणी आल्यावर नर बिबट्या वनविभागाच्या जाळ्यात अडकला. यावेळी वनपरिक्षेत्र अधिकारी संतोष दोडके, कर्मचारी, तसेच युसूफ खान अय्युब खान, सादिक खान मेवाती, आदिल खान मेवाती, सलीम खान मेवाती, शकील खान मेवाती, उमर खान मेवाती यांच्यासह सुमारे २५ ते ३० ग्रामस्थ उपस्थित होते.