दुभाजकापासून वळण घेणाऱ्या कंटेनरला भरधाव कारची धडक; एकाचा मृत्यू, एक गंभीर जखमी

या भीषण अपघातामध्ये कार चक्काचूर झाली आहे.

करमाड : छत्रपती संभाजीनगर-जालना महामार्गावरील करमाड, सटाणा शिवारातून डीएमआयसीकडे जाताना वळण घेत असलेल्या कंटेनरला, जालन्याकडे जाणाऱ्या कारने जोरदार धडक दिली. कारमधील आदित्य शिवाजी धुपे (वय २१, रा. दावरगाव ता. अंबड, जि. जालना) या तरुणाचा जागीच मृत्यू झाला. तर नवनाथ धनंजय भिडे (वय ३५, रा. जामखेड, ता. अंबड, जि. जालना) हे गंभीर जखमी झाले आहेत. अपघात सोमवारी दुपारी ३ वाजेच्या सुमारास घडला.

याबाबत अधिक माहिती अशी की, जालन्याकडून येऊन डीएमआयसीकडे जाणाऱ्या कंटेनर (एमएच ४३ वाय ६०६५) करमाड-सटाणा शिवारातील उड्डाणपुलाकडे जाण्यासाठी असलेल्या दुभाजकाजवळ वळण घेत असताना, छत्रपती संभाजीनगरकडून भरधाव वेगात येणाऱ्या कारने (एमएच २३ वाय २२८१) धडक दिली. या अपघातामध्ये कार चक्काचूर झाली आहे. घटनेची माहिती मिळताच करमाड पोलिस ठाण्याचे सपोनि. प्रताप नवघरे व त्यांच्या सहकाऱ्यांनी घटनास्थळी धाव घेतली. नरेंद्राचार्य रुग्णवाहिका चालक बाळू कातखडे यांना बोलावून, जखमीला छत्रपती संभाजीनगर येथील शासकीय रुग्णालयात दाखल केले. घाटी रुग्णालयात तेथील डॉक्टरांनी आदित्य धुपे यांना तपासून मयत घोषित केले. शिवाजी मदेवाड हे पुढील तपास करत आहे.