उपजिल्हा रुग्णालयाचा कारभार तीन वैद्यकीय अधिकाऱ्यांवर

वरोरा उपजिल्हा रुग्णालयाच्या स्थापनेपासून वैद्यकीय अधिकाऱ्यांच्या रिक्त पदाचे ग्रहण आजही कायम आहे. वैद्यकीय अधिकाऱ्यांची आठ पदे मंजूर आहेत. मात्र सध्या तीन वैद्यकीय अधिकारी कार्यरत

वरोरा : वरोरा उपजिल्हा रुग्णालयाच्या स्थापनेपासून वैद्यकीय अधिकाऱ्यांच्या रिक्त पदाचे ग्रहण आजही कायम आहे. वैद्यकीय अधिकाऱ्यांची आठ पदे मंजूर आहेत. मात्र सध्या तीन वैद्यकीय अधिकारी कार्यरत असून या तीनपैकी एका वैद्यकीय अधिकाऱ्याला अन्य रुग्णालयात प्रभारी म्हणून पाठविण्यात आल्याने सध्या उपजिल्हा रुग्णालयाचा डोलारा दोन वैद्यकीय अधिकारीच सांभाळत आहे. त्यामुळे रुग्णांना मोठा त्रास सहन करावा लागत आहे. येथील उपजिल्हा रुग्णालयाला वरोरा तालुक्यातील माढेळी, नागरी, कोसरसार, सावरी प्राथमिक आरोग्य केंद्र जोडण्यात आले असून वरोरा शहर तसेच वरोरा, माजरी व शेगाव पोलीस ठाण्यातील वैद्यकीय कामकाजही येथूनच केले जाते. उपजिल्हा रुग्णालयाच्या स्थापनेपासून आजतागायत कधीही वैद्यकीय अधिकाऱ्यांची मंजूर असलेली पदे पूर्णपणे भरण्यात आली नाहीत. आजही तीच स्थिती कायम आहे. येथे कागदोपत्री सध्या तीन वैद्यकीय अधिकारी असून त्यातील एका वैद्यकीय अधिकाऱ्याला इतरत्र बोलाविण्यात आल्याने सध्या दोनच वैद्यकीय अधिकारी कार्यभार सांभाळत आहेत. सध्या बाह्यरुग्ण संख्या दर दिवशी ३०० च्या जवळपास आहे. त्यानंतर शवविच्छेदन, आरोपीची वैद्यकीय तपासणी, बाळंतपण, अपघात, शस्त्रक्रिया शिबिरे आदी कामकाजाचा मोठा ताण उपजिल्हा रुग्णालयावर आहे. अशा परिस्थितीत वैद्यकीय अधिकाऱ्यांची पदे रिक्त असल्याने कर्तव्यावर असणाऱ्या वैद्यकीय अधिकाऱ्यांवर अधिक कामाचा बोझा वाढत आहे. त्यामुळे रुग्णांनाही त्याचा मोठ्या प्रमाणात फटका बसत असल्याचे दिसून येत आहे. वरोरा शहरातून नवी दिल्ली चेन्नई रेल्वे मार्ग व राज्य मार्ग असल्याने अनेकदा अपघात होत असतात. या अपघातातील जखमींना उपजिल्हा रुग्णालयात उपचाराकरिता दाखल करण्यात येते.वैद्यकीय अधिकाऱ्यांची रिक्त पदे व सुविधांचा अभाव यामुळे रुग्णांना पुढील उपचाराकरिता चंद्रपूर, वर्धा नागपूर आदी ठिकाणी हलविण्यात येते. परिणामी रुग्णांना, त्यांच्या आप्तेष्टांना मोठा त्रास सहन करावा लागत आहे. वैद्यकीय अधिकाऱ्यांची रिक्त पदे तातडीने पूर्ण करण्याची मागणी केली जात आहे. रिक्त पदासाठी आरोग्य विभागाच्या वरिष्ठ कार्यालयाशी पत्रव्यवहार केला असल्याची माहिती उपजिल्हा रुग्णालयाचे वैद्यकीय अधिकारी डॉ. भगत यांनी दिली. (तालुका प्रतिनिधी)