अपहरण करून खून करण्याचा प्रयत्न करणाऱ्याला पकडले

जुन्या वैमनस्यातून एका इसमाचे अपहरण करून त्याचा खून करण्याचा प्रयत्न करणाऱ्यांना पोलिसांनी पाठलाग करून पकडले.

चंद्रपूर : जुन्या वैमनस्यातून एका इसमाचे अपहरण करून त्याचा खून करण्याचा प्रयत्न करणाऱ्यांना पोलिसांनी पाठलाग करून पकडले. ही कारवाई मंगळवारी रात्री करण्यात आली.येथील जनता महाविद्यालय चौकात दोन आरोपींनी एका इसमाला बळजबरीने आपल्या स्वीफ्ट गाडीमध्ये कोंबले आणि वाहन घेऊन सुसाट वेगाने नागपूर मार्गावर रवाना झाले. हा प्रकार बघणाऱ्यांनी याची माहिती पोलीस नियंत्रण कक्षाला दिली. कंट्रोल रुममधून ही माहिती रामनगर व जिल्ह्यातील इतर ठाण्यांना देण्यात आली. सर्वांना सतर्क करून संबंधित गाडीचा शोध सुरू केला.दरम्यान, माजरीचे ठाणेदार तामटे व भद्रावती पोलीस नाकेबंदी करीत असताना सदर वाहन तिथे थांबले नाही. त्यामुळे पोलिसांनी वाहनाचा पाठलाग करीत कोंढा फाटा येथे अडविण्यात आले. गाडीत फिर्यादी जखमी अवस्थेत आढळला. आरोपींनी फिर्यादीला चाकूने मारले व चावा घेऊन जिवानिशी मारण्याचा प्रयत्न केल्याचे फिर्यादीने सांगितले. या प्रकरणात वाहनातील दोन्ही आरोपींना अटक करण्यात आली. पुढील तपास रामनगर पोलीस करीत आहेत. (शहर प्रतिनिधी)