चंद्रपूर : कोरोना महामारीत अनेकांचा मृत्यू झाला. लहान मुले पोरकी झाली. हे दु:ख फार मोठे आहे. अशी वेळ कोणत्याही कुटुंबावर येऊ नये, यासाठी नागरिकांनी गाफील राहू नये, असे आवाहन पालकमंत्री विजय वडेट्टीवार यांनी केले. सावली तालुक्यातील व्याहाड खुर्द येथील कार्यक्रमात मित्र परिवारातर्फे कुटुंबांना आर्थिक मदत करताना ते बोलत होते.
यावेळी गडचिरोलीचे जि. प. सदस्य रामभाऊ मेश्राम, जिल्हा मध्यवर्ती सहकारी बँकेचे संचालक संदीप गड्डमवार, माजी सभापती दिनेश चिटनूरवर, सावली पंचायत समितीचे सभापती विजय कोरेवार, देवराव भांडेकर आदी उपस्थित होते. पालकमंत्री वडेट्टीवार म्हणाले, जगावर आलेले कोरोनाचे संकट अतिशय गंभीर आहे. त्याची झळ देश, राज्य आणि जिल्ह्याला बसली. अनेकांनी आपले आप्तस्वकीय गमाविले. त्याची भरपाई होऊच शकत नाही. शासन-प्रशासन म्हणून जे काही करणे शक्य होते, त्यासाठी उपाययोजना करण्यात आल्या. कोरोनाचा प्रादुर्भाव रोखणे आणि मानवी साखळी तोडण्यासाठी लॉकडाऊन लावण्याशिवाय पर्याय नव्हता. संभाव्य तिसऱ्या लाटेची शक्यता वर्तविण्यात येत आहे. त्यामुळे स्वत:सह आपल्या परिवाराची काळजी घ्या, असे आवाहन पालकमंत्री विजय वडेट्टीवार यांनी केले. सावली तालुक्यात आतापर्यंत ४८ जणांचा मृत्यू झाला. लॉकडाऊनमुळे रोजगार गमाविलेले नागरिक, सलून, चहाचे टपरीचालक, मोची, सुतार आदींना मदत देण्यात आली. कार्यक्रमाला यशवंत बोरकुटे, राजेश सिद्धम, नितीन गोहणे, उषा भोयर, युवराज पाटील, कवडू कुंदावार, नितीन दुवावार उपस्थित होते.