वाहतुक निरीक्षकाकडून ४० हजारांची खंडणी, अशोक मत्तेला अटक व सुटका

चंद्रपूर : उपप्रादेशिक परिवहन अधिकारी कार्यालयातील वाहन निरीक्षकांकडून ४० हजार रुपयांची खंडणी घेतल्याप्रकरणी येथील अशोक मत्तेला रामनगर पोलिसांनी अटक केली. ही कारवाई २५ जानेवारीला ५ वाजता करण्यात आली. बुधवारी पोलिसांनी न्यायालयात हजर केला असता जामिनावर सुटका करण्यात आली.

लाचलुचपत प्रतिबंधक विभागाच्या माध्यमातून लाच घेताना अडकवतो, असे म्हणून दरमहा खंडणीची मागणी केल्याची तक्रार श्रीनिवास जल्लावार यांनी रामनगर पोलीस ठाण्यात केली. याआधारे पोलीस अधीक्षक अरविंद साळवे यांच्या मार्गदर्शनात रामनगर पोलिसांनी सापळा रचून येथील जिल्हा स्टेडियम परिसरात वाहन निरीक्षक जल्लावार यांच्याकडून ४० हजार रुपये घेतल्यानंतर पकडले. याप्रकरणी पोलिसांनी कलम ३८४ अन्वये गुन्हा दाखल करून अशोक मत्तेला अटक केली. अधिक तपासाच्या अनुषंगाने पोलिसांनी न्यायालयात हजर केले असता जामिनावर सुटका करण्यात आली. अधिक तपास रामनगरचे सहाय्यक पोलीस निरीक्षक एच. व्ही. एकरे करीत आहे. या प्रकरणात अशोक मत्तेवरील कारवाई टाळण्यासाठी चंद्रपूर आमदार किशोर जोरगेवार हे रात्रीत पोलीस ठाण्यात गेले होते, अशी चर्चा शहरात सुरू होती. यामुळे या प्रकरणाला नवे वळण आले.

दारू तस्करांकडून बदनामीचा प्रयत्न : किशोर जोरगेवार

अशोक मत्तेवरील कारवाई टाळण्यासाठी मी रात्री पोलीस ठाण्यात गेल्याचे माझ्याही कानावर आले. वास्तविक, मत्ते हे काँग्रेसचे कार्यकर्ते आहे. त्यांना सायंकाळी ५ वाजता अटक झाली. कारवाई झाल्यानंतर पाेलीस ठाण्यात जाण्याचा प्रश्नच येत नाही. काही दारू तस्करी करणारी मंडळी ही खोटी माहिती जनतेत पसरवून बदनामी करण्याचा प्रयत्न करत आहे, अशी प्रतिक्रिया आमदार किशोर जोरगेवार यांनी दिली.

बाॅक्स

तक्रारीचा आरटीओशी काहीही संबंध नाही

ही तक्रार वाहन निरीक्षक श्रीनिवास जल्लावार यांची खासगी आहे. या कारवाईशी चंद्रपूर उपप्रादेशिक परिवहन अधिकारी कार्यालयाशी काहीही संबंध नाही, अशी प्रतिक्रिया नव्यानेच रूजू झालेले चंद्रपूरचे उपप्रादेशिक परिवहन अधिकारी किरण मोरे यांनी दिली.