दुचाकींच्या वेगवेगळ्या अपघातांमध्ये तिघे जखमी

खामगाव येथील घटना.

खामगाव (जि. बुलडाणा ): दुचाकींच्या वेगवेगळ्या तीन अपघातांमध्ये तिघे जखमी झाले. या घटना २९ व ३0 जुलै रोजी घडल्या. चांगेफळ येथे दुचाकीने जात असलेले निवाणा येथील कपिल संजय भिलंगे व प्रमोद समाधान धामोडे यांच्या वाहनाची मार्गाने जात असलेल्या विजय देवराज टेकाडे (१७, रा. निवाणा) याच्या सायकलला मागून धडक लागली. यामध्ये विजय टेकाडे हा गंभीर जखमी होऊन बेशुद्ध झाला. त्याला स्थानिक नागरिकांच्या मदतीने १0८ क्रमांकाच्या रुग्णवाहिकेने शेगाव येथील सईबाई मोटे रुग्णालयात हलविण्यात आले. दुसरी घटना शेगाव-नागझरी मार्गावर घडली. शेगाव तालुक्यातील कळंबा येथील रहिवासी सुमीत किसन आरज (२५) हा मित्रासोबत २९ जुलै रोजी रात्री मोटारसायकल (एमएच३0-एजे-९२६५) ने घराकडे जात असताना समोरून येणार्‍या मोटारसायकल (एमएच २८ एम-१३९३) च्या चालकाने समोरून भरधाव येऊन जबर धडक दिली. अपघातात सुमीत किसन आरज हा जखमी झाला तसेच मोटारसायकलचेही नुकसान झाले. दरम्यान दुचाकी घसरल्याने चालक जखमी झाल्याची घटना शेगाव मार्गावर खामगावनजीक जयपूर फाटा वळणावर ३0 जुलै रोजी सायंकाळी ७.३0 वाजताच्या सुमारास घडली. मोहना मांडवा (ता. मेहकर) येथील गणेश हरिभाऊ मोहिते (२७) हा दुचाकीने खामगावकडून शेगाव येथे जात होता. जयपूर फाटा वळणावर त्याचे नियंत्रण सुटल्याने दुचाकी घसरून तो गंभीर जखमी झाला. त्याच्यावर येथील सामान्य रुग्णालयात प्रथमोचार केल्यानंतर अकोला येथे हलविण्यात आले.