११ व १८ ऑक्टोबर रोजी विशेष मोहीम

मतदार याद्यांच्या पुनर्निरीक्षणाचा कार्यक्रम प्रभावीपणे राबवाविण्याचे जिल्हाधिका-यांचे निर्देश.

बुलडाणा : भारत निवडणूक आयोगाने मतदार याद्यांच्या पुनर्निरीक्षणाचा कार्यक्रम हाती घेतला आहे. या कार्यक्रमांतर्गत प्रारूप मतदार याद्या प्रसिद्ध करणे, यादीवरील दावे व हरकती स्वीकारणे, मतदार यादीतील संबंधित भागाचे वाचन व नावांची खातरजमा करणे आदी विशेष मोहिमांचे आयोजन करण्यात येणार आहे. या कार्यक्रमाला सर्वांंनी सहकार्य करावे आणि हा कार्यक्रम जिल्ह्यात प्रभावीपणे राबविला पाहिजे, असे प्रतिपादन जिल्हाधिकारी किरण कुरुंदकर यांनी बुधवारी केले. जिल्हाधिकारी कार्यालयाच्या सभागृहात मतदार याद्यांच्या विशेष संक्षिप्त कार्यक्रमाबाबत बैठकीचे आयोजन करण्यात आले होते. त्यावेळी जिल्हाधिकारी कुरुंदकर बोलत होते. याप्रसंगी उपजिल्हाधिकारी (निवडणूक) रमेश घेवंदे तसेच विविध राजकीय पक्षांचे जिल्हाप्रमुख, पदाधिकारी उपस्थित होते. या कार्यक्रमातंर्गत प्रारूप मतदार याद्यांची प्रसिद्धी ८ ऑक्टोबरला करण्यात येणार असल्याचे सांगत जिल्हाधिकारी म्हणाले, मतदार याद्या प्रसिद्ध झाल्यानंतर या यादीवरील दावे व हरकती ७ नोव्हेंबरपर्यंंत स्वीकारण्यात येणार आहे. मतदार यादीमधील संबंधित भागाचे ग्रामसभा किंवा स्थानिक संस्था येथे वाचन आणि आरडब्ल्यूएसोबत बैठक १४ ऑक्टोबर रोजी घेण्यात येणार आहे. याच दिवशी नावांची खातरजमा करण्यात येणार आहे. जिल्हाधिकारी पुढे म्हणाले, या कार्यक्रमांतर्गत मतदार यादीत नाव समाविष्ट करणे, नाव दुरुस्त करणे, नाव वगळणे यासाठी विशेष मोहिमांचे आयोजनही करण्यात येणार आहे. या विशेष मोहिमा ११ व १८ ऑक्टोबर रोजी आयोजित होतील. त्याचप्रमाणे मतदार यादीवर आलेले दावे व हरकती ३0 नोव्हेंबरपर्यंंत निकालात काढावयाच्या आहेत. त्यानंतर २४ डिसेंबरपर्यंंत डाटा बेसचे अद्ययावतीकरण करण्यात येणार आहे. अंतिम मतदार यादी १६ जानेवारी रोजी प्रसिद्ध करण्यात येईल. राजकीय पक्षांनी सहकार्य करावे तसेच मतदारांनी आपले नाव बिनचूक असल्याची खातरजमा करावी, असे आवाहन त्यांनी केले.